Missionary telin Haiti-ah hnuchham in atangin mi pakua ru bo

Haiti khawpui, Port-au-Prince bula hnuchham enkawlna in atangin Pathianni khan Irish missionary leh naupang kum thum mi telin mi pakua ruk bo an ni tih thuneituten an sawi.
Kenscoff-a mi mal hnuaia hnuchham enkawlna hmun, Sainte-Hélène orphanage-a an director, Gena Heraty-i pawh ruk bo zingah hian a tel niin Mayor Massillon Jean chuan a sawi a ni.
Pianphunga rualbanlo tela mi 240 chuang enkawlna hmun atang hian thawktu dang pasarih leh naupang ruk bo tel an ni.
Jean chuan hnuchhamin tlai dar 03:30 (India-a chhun dar 01:00) velah ‘ruahmanna fel tak neiin, silai hmet puak miah lova luhchilh a ni’ tih a sawi.
A beitute hi bang chhe kar atangin an lut a, Heraty-i chenna bik in an pan nghal a ni.
Haitian chanchinbu, Le Nouvelliste chuan mi sual pawl (gang member)-te a nih a rinawm niin an tar lang.
Heraty-i hi kum 1993 atanga Haiti-a awm tawh niin hnuchham in enkawltu pawl chuan an sawi a, an u leh naute ruk bo an nih thu pawh an puang tawh niin AFP news agency chuan a tar lang.
A rutute hian thil phut emaw, tlanna sum pek tur emaw engmah sawi an la nei lo.
Ireland-a foreign affairs department chuan he thil thleng hi an ngaihven a, an palaite nen an inrawn reng tih a puang.
Heraty-i hi Liscarney, County Mayo-a piang niin a mihringpuite tana a thawh nasat avangin chawimawina pawh a dawng nual tawh a, heng zingah hian Oireachtas Human Dignity Award pawh a tel.
Kum 2022 khan Irish Times hnenah gang-te tharum thawhna leh a himna ngei pawh derthawng mah se Haiti chhuahsan tumna a neih loh thu a sawi a. “Naupangte hi ka la awm reng chhan an ni,” a ti.
Kum 2025 tir lam atang khan Port-au-Prince chhim lam daia Kenscoff hi mi sual pawlte chet nasatna hmun ber a ni tan.
Haiti-a police leh anmahni puitu, Kenyan police bakah ram dang mi rawih ralthuam keng drone nen mi sualte hi beiin an tanhmunte pawh laksak nual tawh mah se an chetna a tlahniam tak tak chuang lo.
Port-au-Prince hmun dangah pawh gang-te tharum thawhna hi a thleng nasa hle a, UN chuang heng ralthuam keng pawlte hian khawpui 85% chuang an thunun niin an sawi.
July 7 khan Unicef-a thawk paruk chu Port-au-Prince-ah mi sualten an ru bo tawh a. A tukah pakhat chhuahin mi dang panga chu chawlhkar thum an kawl.
Kum 2025 chawhma khan mi 350 vel ruk bo niin UN chuan a sawi a. Mi 3,141 thah an ni bawk.