Missionary tunu Pi Vaili thlahliam dawn

Mizorama chanchin tha hriltu hmasate zinga mi
RA Lorrain-a tunu Pi Vaili chu Thawhtanni khan Siaha district-a Serkawr khuaah a boral a, Nilaini hian amah thlahna hun hman a ni dawn.
Tualchhunga mite’n ‘Pi Vaili’ tia an koh Pi Vaili hi a lai ah hming chu Violet Louise Anne Lorrain Foxall a ni a, Lakher Pioneer missionary Reginald Arthur Lorrain leh Moud Louise Lorrain te tunu niin, Mizoramah a awm zui a ni.
Serkawr-a an chenna inah Evangilical Church of Maraland (ECM) te’n amah thlahna hun an hmang dawn a, ECM aiawh te, Mara Engvangilical Church (MEC), Myanmar aiawh leh Congregation Church of India (CCI), Maraland aiawhte’n amah thlahna thu an sawi ang. Chumi zawhah a vuina hun hman a ni ang.
Serkawr-a an chenna in bulah hian a nu leh pa ruang leh a pi leh pu ruang an lo zalh tawh a, ani pawh hi thlanmuala phum lovin an huanah phum a ni ang.
Pi Vaili pu RA Lorrain-a hi Pu Buanga (JH Lorrain) nen unau an ni a, Mara-te zinga chanchin tha hriltu hmasa mai a ni lo, A AW B siamsaktu, Bible lettu, hla bu siamtu a ni a, zirna lama bultantu a ni bawk. Chumi tunu Pi Vaili hian Mara tlangval a nei a, Serkawr-ah an awm a ni.
RA Lorrain-a te nupa hian fanu Louise Marguerite Tlôsaih Lorrain an nei a, tualchhung mite’n Pi Tlosaih tiin an ko thin. Pi Tlosaihi leh a pasal Albert Bruce Faxall te fanu a ni Pi Vaili hi.
1938-a piang Pi Vaili hi Mara naupang zinga seilian a ni bawk a, Mara tawng leh nunzia a hre hle. Pasal a neih hnu phei chuan an hnam chaw kalsanin tualchhung mite ei ang a ei a ni. Mara tlangval L Mark (Rev) nen an innei a, a pasal hi kum 94 mi niin, an fapa upa ber te chhungkua nen an chengho. L Mark nen hian 1969-ah an innei a ni.
Pi Vaili hi missionary tunu a ni mai lo a, kum 21 a tlin kum, 1959-ah khan Pioneer Mission Home Office Committee-in “Tunah chuan Vaili pawh kum 21 a lo tlin ta a, tun atang chuan Lakher Pioneer Missionary-a chhiar tel a ni ta e,” tia thu an tihtluk avangin missionary-ah chhiar a ni.
Rawngbawlnaah a tangkai a, Kristian Naupang Pawl president te, CCI (M) Assembly treasurer te leh chanvo pawimawh tak tak a lo chelh tawh. 1994 February ni 28-ah Rev Dr. F. Lambert Carter, Congregational Of New South Wales moderator-in Reverend nih turin Serkawr biak in-ah a nemnghet (Ordained) a ni.
Hmun dangah lehkha a zir lo a, an in chhunga a zir bak chu zirna sang tak a thleng lo. Kum 16 a nihin Mission School-ah naupang a zirtir thin a, ziak leh chhiar thiam loh Mara naupangte a zirtir thin. Heti lai hian rawngbawlna hrang hrangah a nu leh pa a pui thin bawk.
Pi Vaili chanchin hi ECM, CCI(M) leh MEC te’n a huhovin an buatsaih a, chutah chuan “Marate Nu, Pi Vaili tunah chuan mual min liamsan ta. Tunah chuan ni tlak ngai lohna Khawpui, lenrual lungduhte an kimna hmun, mi thianghlimte lenna Khawpui, a nu leh a pa, a pi leh pu te’n an lo nghahna hmunah Marate lo hmuak turin a kalsan ta hlawm a ni,” tiin an ziak.