Mit chungchanga hriat tur pawimawh

Mit chungchanga hriat tur pawimawh
Kan khawhmuh a fiah that a, kan mitah nawm lohna em em a awm lo a nih chuan mit hriselna chungchang hi ngaihpawimawhah kan nei vak lo thin. Mahse, chhete pawha a nawm loh deuh chuan kan buai leh nghal luai thin si. Screen êng en rei lutuk te, ei leh in lama mit tana chaw tha ei ngai loh vang leh in chhung leh pawnlam boruak pollution vang te hi mit lama harsatna kan tawhna chhan tam deuh ber a ni ta.
World Health Organisation (WHO) chuan khawvela mi maktaduai 285 te chuan khaw hmuh lamah harsatna kan nei niin an chhut a, chung zingah maktaduai 39 te chu an mit a del a, maktaduai 246 te chuan mit khawhmuh fiah lo satliah leh nasa deuh te an nei ve thung.
P.D. Hinduja Hospital & MRC-a Consultant Pediatric Ophthalmologist leh Squint Specialist Dr Ashwin Sainani chuan, “Tuten emaw a tha an tih vanga kan tih ve ngawt avangin kan mit kan tichhe nasa. |henkhat chuan an mit tihfai nan rose water an hmang a, thenkhat chu tuivawtah an mit chiahin mit an khap thin. Heng thil te hi mit tan a tha tih scientific taka tihchianna engmah a awm lo a, tihchian tum pawh a tul hke lo. Kut huha mit tihfai mai kha a tawk a ni. Mit a sen a, mitek a awm bawk chuan, mit tana tha ni a an sawi rose water leh hnute tui tih vela sil loh tawp tur. Mit doctor rawn thuai zawk ang che. Tin, mitthlawr pawh hi mahni thua duh duh lo hman ve ngawt tur a ni lo, doctor-in a chawh chauh hman tur a ni,” a ti.
Director & HOD, Ophthalmology, FMRI, Gurgaon Dr Anita Sethi chuan, “Mitah rannung emaw bawlhhlawh emaw a lut a nih chuan mit nuai loh tur a ni. Tui thianghlima sil tur a ni a, vawi hnih khat sil hnuah a nuam thei chuang lo a nih chuan doctor rawn tur a ni. Contact lens vuah chunga muthlih te pawh thil pawi tak a ni, zirlai thenkhatin an lehkhazir laiin an mutchhuak lutukin contact lens vuah chunga muthilh palh an ching a, hei hi tih loh tawp tur a ni,” a ti.
Dr Anita chuan, “Tunlai naupang zingah near-sighted (Myopic) an tam ta hle. A chhan nithei chu smartphone hman nasat vang te, video games khelh nasat vang te pawh a ni thei. Nu leh paten kan fate ‘screen time’ kan tihtlem a pawimawh a, lehkhachhiar dan tha zirtirin, êng tha tawk lo hnuaia lehkha chhiar tir loh te, mu chunga lehkha chhiar tir loh te, lirthei chelaia chuang chunga lehkha chhiar tir loh te a pawimawh a, an ei leh inah pawh thlai ei tam tir tur a ni a, thlai rawng tak apiang a tha a, nitin thei eitir bawk tur a ni,” a ti.
Dr Sainani chuan, “Hetiang hi a symptom a langchhuak lem lo a, mit doctor hnena inentir chauha hriat theih a ni a, chuvangin naupang chu a mit sawiselna a neih loh pawhin a khat mawi tawka mit doctor panpui thin tur a ni,” a ti.
Mit hrisel nei turin mit exercise te pawh a pawimawh a, mit exercise lak dan tha ni a Times of India health section-in a tarlan te kan rawn chhuah chhawng e:
1. Towel pakhat tui sa-ah chiah la, towel dang chu tui vawtah chiah ve thung rawh. Towel lum zawk chuan i hmai khuh la, i mitko (eyebrow), mitvun (eyelids) leh biang te khuh tir rawh. Chumi hnuah towel vawt chuan khuh leh ang che. Chutiang chuan vawi eng emawzat thlak tawn a, a tawp nan towel vawt zawk i hmang dawn nia.
2. I mit chhing la, i kutzungtangin i mit chu minute hnih vel a kual (circular) zawngin massage la, na lutuk loin nem ang che.
3. Bang hmachhawnin thu emaw ding emawin awm la, i kutzungpui chu i mit zawngah inches 10 vela hlaah dah la, tichuan second 10-15 vel i kutzungpui chu melh bing (focus) rawh. Chumi hnuah feet 20 vela hlaa thil awm melh bing leh ang che. Tichuan i veilama thil awm melh bing leh la, chumi hnuah i dinglama thil awm melh ding leh rawh. Hetiang hian vawi 3-4 vel ti ang che.