Bawnghnute him lo in vanga thi paruk tling tawh
Bawnghnute him lo in vanga thi paruk tling tawh
Andhra Pradesh-a East Godavari district-a Rajamahendravaram-a bawnghnute tihdanglam nia sawi in avanga mi pahnih an thih belh leh hnuah he thil thleng avanga thi hi mi paruk an tling tawh niin thuneituten an sawi.
Chhui chianna hmasaah chuan mi mal firm-a bawnghnute tihdaihna hmuna coolant gas put vangin he thil hi a awm tih an sawi.
State Health Commissioner G Veerapandian chuan Thawhlehni zing khan mipa naupang kum ruk mi leh hmeichhia kum 58 mi, enkawl mek chu an thi niin a sawi. Mi dang pasarih pawh an dinhmun a ṭha lo hle nia sawi a ni bawk.
Veerapandian chuan forensic team-te chuan bawnghnute sample an la khawm tih sawiin chhuina hmasaah hian coolant putin bawnghnute hi a tibawlhhlawh a Nu thei tih a sawi. A chhan dik tak erawh chhui chian a nih hnuah hriat chian a nih tur thu a sawi.
Thuneitu dang pakhat chuan Varalakshmi Dairy-in refrigeration unit-ah coolant atan ethylene glycol a hmang a, hei hi bawnghnute-ah a kai a, a tibawlhhlawh a, hei vang hian inte zingah nat phah an awm ta tih a sawi.
“Ethylene glycol hi automobile leh industrial chiller-ah coolant atan hman a ni tlangpui a, a hlauhawm em avangin bawnghnute tihdaihnaah erawh hman a ni lo. Food grade propylene glycol hi dairy leh food industry-ah chuan a him zawk avangin hman a ni tlangpui,” tiin a sawi.
Veerapandian chuan he harsatna tawkte hian kum sawm dawn lai chu supplier pakhat aṭangin bawnghnute an lei tawh tih a sawi a. A leitute chuan bawnghnute thlum a danglam tih an hmu hmasa ber a, a hnu rei vak lovah mi tam tak chuan luak chhuak leh natna khirh tak an nei tih an sawi a, damdawi inah dah an ni ta a ni tih a sawi.
“A tuar zawng zawngte hi hmun khata awm vek an nih avangin doctor-te chuan rinhlelhna an nei ta a ni. Damlote chuan thuneitute hnenah natna hi bawnghnute an ei hnuah a intan tih an hrilh a, February 16 khan supplier hian chhungkaw 110 hnenah bawnghnute a thawn a, mimal 315 thisen sample lakkhawm niin test turin thawn a ni tawh a, report nghah mek a ni,” tiin Veerapandian chuan a sawi. Bawnghnute siamna hmun enkawltu? Addala Ganesh chu Thawhlehni khan man a ni.
He thubuai chhuitu, Deputy Police Superintendent Devakumar chuan Varalakshmi Dairy chu man a nih tawh thu leh phalna nei loin a thawk tih a sawi a, chhui chianna chu kalpui mek a nih thu sawiin, forensic leh damdawi thiamte finfiahna nen hmalak belh a nih tur thu a sawi bawk.
Devakumar chuan dan zam zawm dan leh phalna nei lo dairy unit-te hnathawh dan enfiah mek a nih thu a sawi.