Mit tuam chunga ke khata ding rei thei record siam

Mitchhing chunga ke pakhat chauh hmanga din chu in-balance rei a har duh khawp mai, Uttar Pradesh a cheng, Ram Phal, kum 50, chu mit tuam chungin a ke pakhat chauh ringin darkar hnih leh minute 21 a in-balance thei a, a hmaa hetiang record chu minute 20 a khumin Guinness World Records a siam.
Ram hian hetiang record hu tum thum a siam tawh a, 2021 khan vawi khat a siam a, a record midangin an rawn khum nuah 2023-ah record thar vawi hnih a siam leh a, tunah a vawi li nan record a siam leh ta a ni.
Ram chuan, “Ka kum a tam ve tawh tih ka hria, mahse, Guinness World Records bu-ah a thih hma ngeia ka hming chuantir leh ka duh a. Chuvangin he record siam tur hian ka bei leh a, midangin an rawn khum leh mai mai theih loh tura tih ka tum bawk a ni,” a ti.
Hetiang record siam tur hian ke pakhat chauh ringa din tur a ni a, ban pahnih chu sir lamah phar kak chhuah ve ve tur a ni bawk. Ke pakhat chauhin lei/ chhuat a rap tur a ni a, chutihrualin ke lehlam chu chhuat rah nana hman zawk kephah chungah emaw thildang chungah emaw hlan phal a ni lo va, boruakah a inkhai kang reng tur a ni.
Ke khat chauh hmanga din hi thil harsa tak chu a ni lem lo, mahse, din rei erawh a har duh phian a, core body leh ke chak a ngei a, mit tuam chung phei chuan in-balance a harsa lehzual a ni.
Ram hian 2021 khan darkar khat leh minute 6 mit tuam chunga ke khata dingin record a siam a, a hmaa hetiang record chu minute 30 velin a rawn khum a, mahse, thla khat lek hnuah midangin a record an rawn khum a, chumi hnua nikum khan darkar khat leh minute 38 tiin record thar a siam leh a, a record chu an rawn khum leh hnuah Ram hian darkar hnih pelin record thar a siam leh a, hetianga darkar hnih chin thleng thei hmasa ber niin, tunah record thar a siam leh ta a ni.