L. Z. Colney
-- Advertisement --
Tûnah hian mitdel dik chu tu nge ni tih kan sawi dâwn a. He thu chhangtu, Chanchin |ha hriltu (speaker) tha tak chuan heti hian a sawi a, “Mitdel dik tak chu mahni inhmu thei lo hi an ni,” a ti a. Hei hi a dik thei hle awm e.
Ni tin chanchinbuah hian chanchin thar bengvarthlak tak tak hi kan chhiar thin a, a ziaktute hian kan hriat loh tha tak tak, thu thar min hriattir thin. Tuna ka’n sawi duh tak chu political party chungchang hi a ni. Political party-te hian a tlangpuiin an party sawi mawina an ziak ber thin a, hei hi chu a sual lovah ngai ila; amaherawhchu, mi dang party sawi chhiatna an uar lutuk hi chu neutral tan chuan a ngaimawhawm a, a ninawm thei hial a ni. Rulling party ni lo hi chuan Rulling party sawi chhiatna an zawng ni berin a lang thin. Tu party pawh rulling se sawisel bo an awm kher lo vang. Rulling Party sawi chhetu party pawh hi rulling ni ve mah se sawisel bo a ni bîkin a rinawm loh. Eng party pawh hi rulling se, an hun laiah chuan Mizoram tan eng kawng emaw berah chuan Mizoram tan thatna leh hlawhtlinna kawng eng emaw tal an nei ngei ngei thin.
A bik takin, tun hunah hian ZPM party chuan sawrkarna an chang a, ka sawi duh tak chu MNF party thu chhuah a awm chuan ZPM party sawiselna hlir hi an tar lang a ni ber. Kan sawi tâk ang khan, eng party pawh rulling se sawisel bo an awm bîk hauh lo vang. Mi dang dik lohna an hmu thei a, anmahni dik lohna lam erawh chu an hmu thei hauh lo. Chuvangin, Chanchin |ha hriltu speaker tha tak Jaikara chuan, “Mitdel dik tak chu mahni inhmu thei lo hi an ni,” a ti hi a dik chiah a ni. Tuna rulling party sawiseltu leh an dik lohna hmu thei viau si hi rulling an nih lai khan an dik lohna leh an fel lohna lam chu an hmu thei hauh si lo a nih kha.
Chuvangin, political party tinte hian an party hmalakna mipui hnena thahnemngai taka an sawi hi a dik tho a, mi dang party sawiselna leh dik lohna zawng hram hram zawnga party an hruai hi chu a dik lo a ni. Engtin nge Bible-in a sawi kha, “Sawisel suh u, sawisela in awm loh nan, in sawisel ang bawkin an sawisel ang che u,” tih kha party tinte hian hre mawlh rawh se.
Mizoram chu Kristian ram tih kan ni thin a, political party tinte hian mi dang party dik lohna leh sawiselna zawng kher lovin, ram leh hnam hmasawnna turin politics hi hmang hram hram teh se. Mi dang dik lohna hmu thei viau si, mahni dik lohna hmu thei si lo chu MITDEL DIK TAK a ni tih hi hre theuh rawh se.