Mitna hri leng laka fimkhur turin chah

Mizoram Health department chuan tunlaiin India ram hmun hrang hrangah mitna hri a len mek avangin fimkhur turin mipui a chah.
Mit natna, Conjunctivitis (mitsen rum) leng hi Mizoram a thlen tawh thu sawiin, he hri kai nia inhriate tih tur a sawi a. Mit thlawr hma leh mit ek inchar a awmin tui chhuanso lum pip pepa hru turin; tui lum chhuanso a awm loh chuan tui thianghlim in tlak hmang turin; mit thlawr hma in kut silfai thin turin; rawmawl thianghlim, tissue, towel fai hmang chauhin mittui hru turin; pawn chhuahnaah tarmit dum bun thin turin, kut silfai tha turin; mit doctor/ medical officer hnena inentir thuai turin a chah.
He mit natna nei nia inhriat te tih loh tur pawh sawiin, tunlai antibiotics damdawi thenkhat – Moxifloxacin leh Tobramycin hi hman kher a ngai loa, heng antibiotics hman nasat hian taksa ralveng khawl a tihniam a, nakin zelah mit vanga harsatna kan neih enkawl hleihtheih lohin a awmtir thei tih a sawi. Antibiotic hman nasat hi tunlai buaina thar niin, damdawi hnathawh tur thawh tir thei loin, thihna hial pawh a thlen thei tih a sawi.
Steroid mitthlawr chu a nazawnga hmang lo turin a ti bawk a. Steroid tenau deuh pawh doctor-te leh ophthalmologist /medical officer te thu lo chuan hmang mai mai lo turin a ti.
Damdawi dawrah mitthlawr duh duh lei mai mai lo turin, damdawi in hnai ber pan hmasa turin, mit nuai lo turin, chhungte nen lukham leh towel inhmantawm lo turin, naupang mit sen rem rum leh mittui tla reng a nih chuan sikul kai tir lo turin, mit sen rem rum chuan zinchhuah leh vantlang punkhawmnaa kal lo tur leh, ramhnim damdawi leh thei tui hmang mai mai lo turin mipui a chah a ni.