Mittui nena wrestling chawlhsan Phogat

Mittui nena wrestling chawlhsan Phogat
Thawhlehni khan Olympics wrestling women’s Freestyle 50kg semi-final bout-ah Cuba mi Yusneylis Guzman Lopez hnehin Indi tan gold medal emaw silver medal emaw a hmin a, mahse, Nilainia 50kg category gold medal bout khelh hun hmain a rihna chuan a telna category phal chin gram 100-in pel tih hmuhchhuah a ni a, inelna hmachhawn zui thei loa hnawhchhuah a nih hnuah professional wrestling buaipui chhunzawm tura chakna a hloh zawh tak avangin Indian wrestler Vinesh Phogat chuan a infiamna ngainatber atangin a chawl ve ta tih social media kaltlangin a puang.
Vinesh Phogat chuan social media X-ah a nu hming lam tel chungin professional wrestling a chawlhsan thu heti hian lungkuai zetin a t archhuak:
“Nu, wrestling chuan hnehna a chang ngei a, kei hian ka hloh ve thung a nih hi. Min ngaidam ang che aw. Ka mangphan thin te, ka huaisenna leh ka engkim hi a chhe zo ta vek a ni.
“Tunah chuan chakna reng reng ka nei ta lo. Goodbye wrestling 2001-2024 ka tih mai a ngai ta. In vaia chungah leiba ka nei kumkhua dawn a, min ngaidam ang che u,” tiin.
Olympic final atanga ‘disqualify’ a nih dan kha kum 29 mi hian Nilaini khan Court of Arbitration for Sports (CAS) hnenah khingletin, final khel thei loa an hnawtchhuak a nih pawhin final-a chak lo zawk nen silver medal hlan kawp tur talin dilna a thehlut.
Phogat hian semi-final a khelh hma zan khan a rihna tihniam tura a thlan a tihchhuah nasat avang leh thil tuiril lam a in loh luat avangin taksaa tui tlakchhamna a tawk a, chuti chunga riltam chhe lutuk loa a awm theihna’n Games village chhunga polyclinic a pan hial a ni.
50kg category-a khel a nih avangin kg 50 (weigh-in requirements) hi Olympic-a a la dam chhung chuan a pel thiang lo a, mahse, Cuban wrestler a hnehna bout behchhana an buknaah gram 100-in a lo pel si a, a chhe berah pawh Olympic silver medal nena a damchhung la bang zawng hmang thei tur kha kutbeng leh tap vawng vawng chungin inelna hmachhawn chhunzawm thei lo tura hnawhchhuah a ni a, Paris 2024 hi a tana Olympic rilru tina ber a chang ta rih.
Infiamna thlura thuchhe remna sang ber CAS lam hian Paris Olympic Games chhunga thubuai hlabuai ngaihtuahtu tur ‘ad-hoc division’ an tih chu dinin, he’ng mite hian Olympic Games chhung leh Opening Ceremony hma ni 10 huam chhunga thubuai lutte ngaihtuah turin Paris an thutchilh mek a, Vinesh Phogat-i ‘appeal’ thehluh pawh hi an ngaihtuah tura tih a ni.
World Championships bronze medal pahnih awrh tawh Indian wrestler laka tlawm Cuban wrestler Yusneylis Guzman Lopez khan Vinesh hnawhchhuah hlawkpuiin final a lut a, mahse, gold medal bout-a a tumpui American Sarah Ann Hildebrandt lakah tlawmin, Vinesh nen joint silver-medallist an ni dun dawn em tih hriat theih a ni rih lo.
Chutih laiin beiseina erawh a chau khawp mai a, khawvel huapa wrestling thuneitu sang ber United World Wrestling (UWW) lam chuan tuna wrestler-te rihna chungchanga dan an neih mek (weigh-in rule) chu tun dinhmuna tihdanglam theih a nih loh thu Nilaini vek khan an president Nenad Lalovic leh IOA chief PT Usha inbiak hnuah an puang.
Vinesh hian Thawhlehni zan khan history thar ziakin Indian woman wrestler zinga gold medal bout thleng thei hmasaber a ni zet a, mahse, a category huam chin aia gram 100 leka a lo rih belh hman avangin final khel thei loa hnawhchhuah a ni a, a khinletna hi a hlawhtling lo a nih chuan Olympic-a vawithum a inlan tawhah Asian leh Commonwealth Games gold medal ve ve a awrh tawh bak kha chhuan tur a nei dawn ta lo a ni!