Mizo boxer pali telna tur The Punch 10

Zanin zan dar 6 atangin Kolkata-ah The Punch 10 professional boxing series khelh tan a ni dawn a, Mizo boxer pali an inhnek dawn.
Mizo mipa boxer pathum bakah MC Vankimmawii’n Gargi Chahal hmachhawnin Mizo hmeichhe zinga professional boxing khel hmasa ber a ni ang.
Inhnek vawikua awm tur zinga a hmasaberah NT Lalbiakkima’n Thai boxer Kittipong Jareonroy a hmachhawn dawn a, Chhim Keite hi NTP Boxing Training Centre, Chite Veng, Aizawlah ngawrh takin a inbuatsaih mek.
Biakkima hian December 2020 khan professional boxing a khel tan a, a inhnek hmasak vawi liah knockout vekin a chak zawn a, IBA intercontinental title a lak hnuah June 18, 2022 khan Dubai-ah WBC Asian Continental Lightflyweight title a chuh a, Jayson Vayson hneh loin a tlawm a, a inhnek hnuhnun ber a ni.
Kum khat leh thla hnih chuang hnuah hruihrual chhungah a lut leh dawn a, inhnek tam a duh avangin October ni 2-a tan tur Tata SK 612 LPS Pro Fight flyweight-ah a tel dawn bawk a ni.
Mizo hmeichhe zinga professional boxing khel hmasaber ni turin NTP Boxing Training Centre-ah Ramhlun South nula Kimkimi a inpuahchah bawk a, The Punch 10 inhnek hnuhnung berah Haryana boxer Chahal nen an innuai dawn a ni.
Kum 21 mi Kimkimi hian nikum khan North East Olympics leh North East Regional Sports-ah Mizoram tan silver medal a la ve ve a, kumin February khan Aizawl District Boxing Association buatsaih Mizoram Fight Night kg 57 semi-final-ah Ruthi Lal-hmingthai, Reiek a hneh lo.
A hmaa ding tur kum 26 mi Chahal-i’n kumin April khan professional luhchilhin split decision-in Jyoti Shamsher a hneh a, vawihnih a inlanna tur a ni.
Sete Boxing Academy-ah ngawrh takin F. Zoramchhana leh Omega Lalramdina an inbuatsaih a; Cherhlun boxer Zotea hian Bangkok-ah WBA Asia title chuh tawhin a chak zo lo a, kumin March ni 10 khan LPS Fight Night-ah insiamtharlehin Johan Lalrinpuia, Luangmual Vengthlang a hneh a, professional huanga vawiriat a inhnek tawhah tum nga chakin vawi thum a tlawm a, zanin hian Pankaj Kumar nen an inhmachhawn dawn a ni.
March ni 10 LPS Fight Night-ah Dinthar tlangval, kum 20 mi Omega chuan professional luhchilhin David Laldan-mawia, Lunglei a hneh a, vawihnih a inhnekna turah professional boxing vawinga khel tawh Gugan Kumar nen an intawng dawn a, amah aia tawnhriat nei tam lakah chak ngei a inringtawk hle a ni.
Nimin khan Mizo boxer-te hian Kolkata an pan fel.