Mizo film thar ‘Mi Bo’ tlangzarh dawn

Mizo film thar ‘Mi Bo’ tlangzarh dawn
Kuminah Mizo film industry in hma a sawn nasa hle a, kum khat chhunga Mizo film thar tlangzarh tam ber kum a la a, kum tawp dawnah pawh film tlangzarh thar tur a la awm zel a, December ni 20 zanah ‘Mi Bo’ tih film chu Vanapa Hall-ah an tlangzarh dawn a, red carpet leh thunawi dang engmah awm lovin, cinema hall-a film chhuah angin zan dar 8:00-ah he film thar hi an chhuah dawn a ni. Mizo film tan streaming service platform hrang hrang kan nei ve ta a, hei hi film siamtu ten an chhawr hle a, film siam pawhin lukhawng a nei ve tan ta a, hei hi Mizo film industry pawhin hma a sawn pui ta a ni.
“Mi Bo” film hi BISP.FILMS kutchhuak niin Mizo film khawvela a vawikhatna atan khawvel pum huapa company lar tak FUJIFILM India nen tangkawpa siam a ni a, FUJIFILM company bungrua leh film simulation hmanga shoot a ni a, a film hmelhmang pawh nasa takin a danglam dawn niin film siamtute chuan an sawi.
He film director leh writer Raymond Colney chuan, “Kan film siam ve tawh zawng zawngah tuna kan film thar tur MI BO hi a la danglam ber a, mi zawng zawng huapzo tur chi niin, Mizo ten kan la neih tlem em em Krismas thu thlan hmanga thawnthu siam a ni a, chhungkua a en theih tura buatsaih niin, unau inhmangaihna hlutzia lantirna film a ni,” a ti.
MI BO film-ah hian Mizo Film Award 2024 neih zawh taka Best Actor lawmman dawngtu, Maruata Rawite leh Zoparmawii te chang dunin, fahrah unau inhmangaihna chu hna leh natna leh rualawhnain zawi muanga an kara khi chat a siam chhoh dan tarlanna thawnthu a ni a, Maruata Rawite chuan, “Kan film chan tawh zawng zawngah harsa ka la tih ber a ni a, mittui tlakna scene a awm avangin a tir atangin ka huphurh em em a, mahse keimah bikah chuan ka la perform thatna ber film niin ka hria,” a ti.