George L. Ralte, Vaivakawn
-- Advertisement --
Tunlai khawvel hmasawnna leh changkan mek zelah hian rimawi lamah pawh hmasawnna hmuh tura awm zel hi a lawmawm tak zet a ni. He rimawi hian Mizo thalaite-ah nasa takin hma a sawntir niin a hriat a, a lawmawm tak zet a ni. Cable Tv lama rimawi huang en thin te chuan kan Mizo nula thenkhat ten rimawi band dinin rimawi hmanrua chi hrang hrang hmanga Pathian fakna hla te, lengzem hla te, leh hla lenglawng lam hlate an rem han hmuh hian a bikin kan Mizo hmeichhia (nula) te hi rimawi lamah hma an lo sawn tawhzia leh an lo nep lohzia hei hian a tilang chiang hle awm e.
Rimawi rem chungchangah hian Pathian biak inkhawmnaah te, leh khawtlang huapa thil tih pawimawh neih thinnaah te hian mipate mawhphurhnaah dah mai lovin kan Mizo hmeichhiate pawhin rimawi rem chungchangah theihna sang tak an nei tih hre reng chungin he rimawi hmang hian Pathian tan, Kohhran tan, ram tan, leh khawtlang tan theihtawpa tan la thar zel turin leh rimawi lama hmasawn zel turin kan chah ni se la.
Kohhran hrang hranga thalai hruaitute pawhin mahni thalai Member hmeichhe zingah rimawi lama talent nei tak tak inphum rute hai chhuah kawngah tan han la thar zel u la, nu leh pate pawhin in fanute zingah rimawi lama tui tak tak hmasawn duh si, mahse hma lak dan tur hre si lo leh hma lak ngaihna hre lo harsatna nei an awm ngei ang a, chungte hnenah chuan an harsatnate hriatpuiin a theih chen chena hmalakpui zel a pawimawh tak zet a ni. Tin, kan Mizo zingah pawh rimawi hmanrua hmanga ni tin a ei zawnga hnathawkte pawh an awm nual tawh niin a hriat a, heng mite hian Cable Tv lamah te leh chanchinbu lamah te rimawi hmanraw hmanga kan Mizo hmeichhia ten ei zawnna hna tangkai taka an neih theihna tur lam hawi hi ziah tam a, sawi tam ni thin bawk se la, hei hian kan Mizo hmeichhia rimawi lama tui tak tak te hian nasa takin rimawi lamah hmasawn nan leh tangkai taka an hman ngei i beisei tlat ang u.
Kohhran lam hruaitute leh khawtlang lam hruaitute pawhin kan Mizo hmeichhia ten rimawi hmanrua hmang hian Pathian tan, Kohhran tan, khawtlang tan, leh ram tana taima taka rawng an bawl ve zel theih nan inseng huama nasa taka tan lak pui a, Kohhran lama thil tih tur pawimawh a awm a nih pawhin kan Mizo hmeichhia ten rimawi lamah mawhphurhna pawimawh tak rimawi rem an chan ve theih nan chanvo pawimawh pek tam hi uar thar zel turin leh khawtlangah pawh Programme pawimawh hman tur a awm changin rimawi lama mawhphurtu tur te ruat chungchangah mipa tan chauh a chanvo siamsak bik lovin kan Mizo hmeichhiateah pawh rimawi rem lamah chanvo siamsak hi kan uar thar zel a pawimawh a ni.
A tawp berah chuan heng kan Mizo hmeichhiaten rimawi hmanrua chi hrang hrang hmanga hmasawnna leh changkanna an neih meknaah hian duh khawp lohna lai leh sawiselna tur tam tak a awm ngei ang. Chungte chu sawisel mai lovin tun aia nasa zawka kan Mizo hmeichhiaten rimawi hmanga rawng an bawl zel theih nan rimawi lama thiamna sang tak tak nei ten kan Mizo hmeichhiate tan hian rimawi lam ah nasa taka tan lak pui turin kan insawmin kan inchah a ni.