Mizo Icon nih tling Lalremsiami

Mizoramah Icon/Idol kan tuipuiin kan hlimpui ve ta viau a, intihhlimna (entertainment) chikhat a nih rualin inelna a ni a, endiktu an awm a, endiktuten intihsiaknaa ‘thei ber leh thiam ber’ an tih kha ‘Icon/Idol’ chu an lo ni ta mai thin. Icon/Idol te chu mipuiin an hlut a, an ngaisang a, thilpek an pe luih luih a, a khawtlang huapin a lawmna programme ropui tak tak te pawh huaihawt a ni thin. Heng Icon/Idol te hian an nihna hi kawng hrang hrangin an hlawkpuiin hamthatna tam tak an neih phah a, eizawnna tha tak te pawh an neih pha bawk a, a tha phian zel mai.
Hetih lai hian, endiktute point pek vang pawh ni lova mahni tumruhna, taimakna leh huaisenna kaltlanga a ram pum huap anga hriat hlawh, kawng (line) hrang hranga ngaihsanawm leh ngaihhlut tlak nihna nei hi Mizo thalai zingah an awm ve ta nual mai a; hminghmerha sawi dawn pawhin rei tak sawi daih hming a intlar ve tawh awm e. Chung zinga Mizo nula chhuanawm leh ngaihsanawm tak chu hockey player Lalremsiami hi a ni kan ti thei ang.
Infiamna (hockey) lama a theih chungchuanna leh a lansarhna chanchin ringawt pawh hi sawi dawn chuan lehkhabu chhah tak daih a ni a, chutih rualin mi hriat hlawh a nihna (hockey player) phenah hian entawntlak ze ropui tak mai a inphum ru tul mai a ni.
Mizo thalaite tana Icon/Idol nih tling a nihna tam tak zingah point tlemte chauh han tarlang ila. Pakhatnaah chuan hockey khel chunga graduate thei a ni. 2016-a international match a khelh tirha matric pass kha a ni a, Kum 8 a liam hnu, 2024 November ni 19-a international match vawi 152 a khelh khan a graduate hman tawh. International match vawikhat khelh pawh insawitheihna tham a nih tawh laiin, Lalremsiami chuan vawi 152 a khel thei a, a hah thei hle ang tih a hriat reng mai; mahse, chuti chung chuan zirna chawlhsan mai lovin a graduate thei. Hockey inelna sang Women’s Asian Champions Trophy final-ah India-in China an hneh tuma player of the match ni thei Lalremsiami hian, match dangah pawh eng eng emaw chawimawina chu a dawng fo. Sakhaw dang betuten an hual vel a, mahse Daniala ang khan milem be duh lova a Lalpa lama tukverh hawng tlat thin a ni a; missionary ropui tak nih a fawm nghal a tih theih ang.
Pathian a tih dan leh a pa thu a awih dan te, hockey a khelh tirha tawng a thiam loh avanga harsatna a tawh nasat thin dan leh, tawng thiam tuma a beih hnua a khelhpuite mak tih khawpa tawng a thiam leh theih tak dante pawh hi Mizo thalaite tan chuan ngaihsan tur dik, Icon nih tling a nihzia lanna a ni bawk.
Hetianga ram pakhat hmingthatna vaw chhuaktu, Mizo hnam tihmingthatu ni bawk nula Lalremsiami hi thalaite chauh pawh ni lo, Mizo mipuite tan pawh Icon/Idol nih tling a ni.