Mizo inneihna dan siamthatah mipa fa bak Mizoah chhiar dawn tawh lo
Sawrkar pawmpui Mizo Customary Law siamthatah Mizo hmeichhia in hnamdang a neih chuan a fa chu Mizo hnam-in hamthatna a neih ang neih ve remtih a ni dawn tawh lo. Thawhlehnia Assembly Session-ah chief minister Lalduhoma chuan Mizo inneihna dan leh a kaihhnawih siamthatna – ‘The Mizo Marriage and Inheritance of Property (Amendment) Bill 2026’ a pulut a. Bill puluttu hian, a dan hming an siamtha a, inthenna dan nena awm kawp chu paih a, inneihna dan leh ro inluah dan ni mai se, tih a nih thu a sawi.
Dan awmsaa Autonomous District Council pathum huap loh tir ngawt chu, heng ADC hnuaiah hian Mizo Customary Law hmang engemawzat an awm tho avangin, Council area-a awm tan huap tir ve a ni a, traditional customary law nei hran erawh a huap loh ngaiin a huap lo zel dawn tih a sawi a ni.
Dan awmsaah, inneihnaah hian ‘Mizo hnam’ ni zel turin mipa leh hmeichhia a huap vek laiin, tunah chuan a mipa zawk Mizo a nihin a huap anga, a hmeichhia Mizo a nih a, a mipa Mizo hnam zinga tel lo, hnamdang a nih chuan a hmeichhia leh an fate chu an Mizo-na a tawp dawn tih a sawi.
“An faten tribal nihna an claim thei tawh lo anga, he dan hnuaiah hian an awm tawh dawn lo tihna a ni. A mipa chu Mizo a nih chuan he dan hian a huap a, ala hmang zui thei ang,” a ti.
Dan awmsa siamthat dangah, miin nupui pasal nei nawn dawn se, kohhranin revocation certificate leh remarriage license a pek ang deuhin, dan hian inthenna – divorce certificate a phut tawh dawn tih chief minister hian a sawi a. Dan siamthatah hian, midang an nei leh dawn a nih chuan, an nupui/ pasal hmasate nen an inthen chiang a ni tih certificate a ngai tawh dawn tih a sawi a ni.
Nupa inthen kaihhnawihah, hmeichhia ‘mak’ a nihin, chan a nei mang ta loa, ‘sum chhuah’ a nih chuan hmeichhia-in a chhawm zawng zawng a lalet thei vek a. Hemi thlakhlelh avang hian mipa tam takin an nupuite ma duh si loin , sumchhuah lo thei loa siam tir tumna awm tawh thina hriat a nih avangin, hmeichhiate venhimna atan, sum an chhuah pawhin an thawhchhuah dun atanga zaa 50 pel loa hmeichhia in a chan ve theih dan chu he dan siamthatah hian a tel bawk tih a sawi a. Mipa-in a mak duh loh ngawt khan awmzia a nei tawh dawn lo tih a sawi.
Kan tun dinhmun nen inhnerem thei tur leh, MHIP leh heti lam ngaihtuahtu pawl dangte duh dan leh rawtna an neih angin he dan hi siamtha in an pulut tih chief minister hian a sawi a ni.
Sawihonaah, he dan siamthatna hi tha viau angin lang mah se, a lehlama thlir a ngai tel tih House member-ten an sawi a. ‘Sum chhuah’ ah pawh mipa in a nupui a tiduhdah a, a ma duh bawk si lo a nih chuan he dan hi a that viau rualin, hmeichhia in chumi lo zawnga sumchhuah chak viau chhan a neih chuan a venna tur dan a awm leh si lo tih sawi a ni a. Hmeichhiate hamthatna turah mipaten ngawih an chuh reng laiin, hmeichhe chanvo thatna lam a tam telh telh tih sawi a ni bawk.
He dan hi sawiho a nih hnu ah pawm zui a ni.
Dam siamthata thil telh thar dang:
8 Nupa inthen chhan tlak nia danin a ngaih zingah phar (leprosy) natna chu telh thin a ni a. Hei hi vanduaina thil a ni a, nuam leh hrehawm, hrisel leh bawrhsawm lai pawha inkawp tura intiama nupa insiam kan nih angin, phar natna vanga inthen remtihna ang kha paih a ni.
8 Danin ‘inneihna man’ (marriage price) tia a dah zawng zawng chu, Sap tawnga dah loin ‘man leh mual’ tia dah vek nise, a ti a. Hei hi tawng humhalhna a nih bakah kan lo lam dan thin pangngai chhawm tir nise, a ti.
8 Dan awmsaah chuan, court-a heirship certificate successor certificate pek tur a hrana lak ngai thin chu a rual tih theih tawh tura tih a ni.
8 ‘Nu man’ sawifiah a ni a, nupa-in an fanu an hralh chuan, ‘nu man’ hi ama nu in a ei tur a ni loa; an inthen tawh a nih chuan a nu in ‘nu man’ hi a ei tur a ni, tih chauh zawk tih hrilhfiah that a ni.