Mizo kan awm zel theihna turin
kan damrei a, pianpun a ngai
Tun ang zela kan kal chuan zuih lam kan pan thei a, Mizo kan awm zel theihna turin kan damrei a, kan pianpun a ngai tih minister Lalnghinglova Hmar chuan a sawi.
YMA Republic Veng Branch chuan Inrinni khan LBS Suzuki 22nd Inter Branch YMA Football 2025-a an champion leh YMA Day an lawm kawp a, vengchhunga zirlai titha an chawimawi nghal bawk.
Hmanpuitu Lalnghinglova Hmar chuan, damrei zawngah thu kan nei loa, kan dam tawi zawng chu erawh kan thiam loh a ni ve bawk tiin, “Zu in nasat lutuk avangte, inchiu avangte, kan khawsak phung dik tawk lo avangte, zuk leh hmuam avangtein Mizo kan thi nasa lutuk a, kan harh thar a ngai. A bikin mipa kan dam rei a ngai. Mipa kan thi nasa a, hmeithai an tam zel. Mizo kan awm zel theihnan kan damrei a, kan pianpun a ngai. Tun ang zela kan kal chuan a zuih zawngin kan kal a, he hnam hi a awm zel theihnan kan pianpun a ngai,” a ti.
Sports & Youth Services minister chuan Mizo player-ten ISL season liamtaah minute an nei tam ber a, I League-ah phei chuan an tam fal hle tih a sawi a. Chutihrualin football chu mi zawng zawng eizawnna tur a ni lo, tiin, “Talent nei tha zawng zawng an thleng sang chuang loa, vanneih tel a ngai. Lehkha thiam hi eizawnna chu a ni,” a ti a. Zirna leh infiamna kaihkawp thiam a pawimawh tih a sawi.
Sports minister bakah hian hmanpuitu dang – Rajya Sabha MP K Vanlalvena, minister PC Vanlalruata, Ward No. XVII corporator David Zohmangaiha leh Central YMA president Lalhmachhuana te pawhin thu an sawi a ni.
Republic Veng hian an champion hi sial pahnih leh vawk engemawzat talhin an lawm a. Ruai theh hi mi 3000 chuang nia ngaih a ni.
Mizo kan awm zel theihna turin kan damrei a, pianpun a ngai
Get real time updates directly on you device, subscribe now.
Prev Post