Mizo kutchhuak zawrh leh lei theihna website siam thar

Mizo kutchhuak zawrh leh lei theihna website siam thar
Raising and Accelerating MSME Performance (RAMP) MZ4 Marketing Intervention hmalaknaa siam Mizo siamchhuah leh kutchhuak thil zawrhna website – MadeByMizo.com chu Thawhtanni khan Commerce & Industries minister F Rodingliana’n a tlangzarh.
Mizote information technology hmangin sumdawng ve tawh mah ila, a leitu leh hralhtute tana indawrna rintlak, belhchian dawl kan la nei lo tih Commerce minister hian a sawi a. Tunah chuan ram pawn lama leitute pawhin an rin ngam theih tura e-commerce sumdawnna ruahman a ni ta chu lawmawm a tih thu a sawi.
“Ram chhung thil siam leh thar hralhna kawnga kan buaina ber thin chu a hralhchhuahna tur market nena inzawmna (market linkage) a ni a; chu harsatna sukiang tur chuan Mizoram sawrkar Bana Kaih Policy hnuaiah nasa takin hma lak a ni a, he website ruahman tak pawh hi Bana Kaih Policy nen a inhnerem thlap a ni,” a ti.
MadeByMizo.com hi Mizo thil siam quality tha bik, mumal taka thlan chhuahte pholanna leh state pawn lam market-a thawn chhuahna platform a ni. Mizo kutchhuak leh Mizoram raw material hmanga thil siam chauh pholan a ni.