Mizo Language Development Board tha zawk tur kan duang – H&TE minister

Mizo Language Development
Board tha zawk tur kan duang
– H&TE minister
Tangkai zawka hman a nih theihnan Mizo Language Development Board kalhmang tur duanthat mek a ni tih Higher & Technical Education minister Dr Vanlalthlana chuan a sawi.
College leh university-a Mizo subject zirtirtu pawl, Mizo Literature and Language Teachers’Academy (MILLTA) Thawhlehnia Aizawla an inkhawmpui a hmanpuinaah H&TE minister chuan, Mizo tawng tihmasawn tura sawrkar hmasain Mizo Language Development Board (MLDB) a din chu lawmawm a tih thu sawi a. “Tangkai zawka hman a nih theihnan a kalhmang tur duanthat mek a ni a. MLDB hi tangkai taka hman kan tum,” a ti.
College leh university-a Mizo zirtirtute chu Mizo tawng humhalhtu, Mizo nihna (identity) vawngnungtu an nih avangin chhuanawm a tih thu a sawi a. Mizo subject-a zirtirtu, college-a post ruak awmte a tul ang zela hnawhkhah tum a ni tih a sawi a ni.
Mizo tawng humhalh tur leh thangtharte hnena zirtir zel turin, milem bu (comics) hmanga hma lak chhoh tum a nih thu sawiin, Tunah hian Samagra leh SCERT hnuaiah nundan tha inzirtirna (moral reform) bakah Mizo tawng leh nihna zirtir thei chi comics siam zel tum a ni tih a sawi. Ziah zawm leh ziah zawm loh, Mizo tawng humhalh chungchang pawh la zirho zel thaa a hriat thu a sawi bawk.
MILLTA-ah hian Mizoram college hrang hrang, Mizoram University leh ICFAI University atangin member 119 an nei a. Heng zingah hian a ngheta thawk 65, a nghet loa thawk 54 an awm. Inkhawmpuiah hian Aizawla college hrang hrang bakah Mamit, Kolasib, Zawlnuam, Lunglei, Serchhip, Kamalanagar leh hmun dang atangin member an tel a ni.
Inkhawmpuiah hian “Mizo Drama Zirchianna’ tih thupui hmangin seminar an buatsaih a. Mithiam 16-in Mizo lemchan zirchianna paper 13 an buatsaih chu zirho a ni.