Mizo Nationalism Rally-ah Hnam puanzar pholan tum

Zoram zalenna tura nunna hlantu, hnam pasalthate hriatrengna ‘Martar-te Ni’ vawi 42-na pualin MNF Thalai Hqrs chuan Aizawlah two wheeler hmangin vawiin – September 19 hian Mizo Nationalism Rally buatsaih a tum a. Zalenna sual laia Mizo hnam puanzar (Mizoram flag) an duan chu he hunah hian pho chhuah an tum.
MNF Thalai vice president Zodinpuia chuan Mizo thalaite zingah hnam hmangaihna rilru nasa takin a indinthar chho leh ta tih sawiin, Mizote hnamdang lak atanga chimrala kan awm mai lohna tur leh hnam anga kan dam khawchhuah theihna tur chu MNF thlir ber a nih avangin hnam hmangaihna thinlung nei tura nasa taka inzirtir chhoh zel a tul tih a sawi.
Politics khawvelah thalaiten ram leh hnam tana nunna hlan huama lo pen chhuak tawhte chu chawimawi a, ngaihhlut lehzual a ngai tih sawiin, “Kan hnam pasaltha (freedom fighter) ten ram leh hnam tana sulhnu min hnutchhiahte hi chawisan a, Zoram zalenna tura penchhuakte chawimawi thar zel turin kan sawm a ni,” a ti.
India lak atanga Mizoramin zalenna a sual tuma a bul tantu chu Mizo thalaite an ni a, ram leh hnam hmangaihtu Mizo thalai rualten huaisen taka hnam tana an lo beihna avangin Mizoram chu hnamdangte chimral lohin kan awm theih phah tih a sawi. Mizo thalaite kutah Mizoram himna leh boralna tur chu thui tak a innghat tih sawiin, “Thalaiten kan hmabak theuhah rinawmna, dikna, taimakna leh huaisenna vawnhim tlat a tul a ni,” Zodinpuia hian a ti.
Mizo Nationalism Rally hi chhun dar 12-ah AMC office bul, Thuampui Veng atangin MNF Thalai president Dr L Thangmawia, MLA chuan a vailiam anga, hun kharna hi Vanapa Hall kawtah deputy chief minister Tawnluia, Zoramin zalenna a sual laia MNA army chief hoa hman a ni ang.