‘Mizo Talent’-ah Hlupuia talent a hlu ber

‘Mizo Talent’-ah beatboxer Vanlalhlupuia talent a hlu ber a, August ni 30, 2025 zana result an puan tak, LPS Vision Production buatsaih ‘Mahindra XUV 3XO Mizo Talent’-ah Vanlalhlupuia, Kanan Veng, Aizawl chu pakhatna a ni.
Mizo Talent 2025 grand finale hi LPS Arena, Falkland-ah neih a ni a, grand finale-ah hian final round-a intihsiak tur mi pali hming puan a ni a, intihsiakna an neih hnuah Youth Icon star ten concert nei zuiin, Mizo Talent Top 10-a tling, lamthiam rual ‘Team Unknown’ leh Fit In Dance Studio Crew ten performance an nei a, judge zinga mi Nutei Pautu pawhin a naute lam hi zawmin, judge dangte pawh lam turin a kaichhuak.
Pakhatna, Vanlalhlupuia hian lawmman, Rs. 2,00,000 a dawng a, finalist pali zinga pathum te chu pahnihna vek niin, Rs 50,000 theuh an dawng bawk. Pahnihna te chu – Lalrinawma, Nalzawl; Lucy Lalthazuali, Venglai East Kolasib leh 2MG (2 Magician) te an ni.