Mizo Territorial Army hmasa berah mi 72 la phawt dawn

Mizo Territorial Army bultanna atan company hnih din a ni dawn a, a thawhkhatnaah mi 72 lak an ni dawn. Territorial Army (TA) dinna atana Mizoram sawrkarin Coordination & Land Search Committee chairman-a a ruat Lt.Col. Clement Lalhmingthanga sawi danin, TA hi Mizo hlanga din tum a ni a. 166 Infantry Battalion a ni ang. Battalion puitlinga din nghal tur a ni loa, 119 Infantry Battalion – Assam Regiment kaihhruaiin an hnuaiah company hnih din phawt a ni ang.
Company khatah hian commanding officer 1, junior commissioned officer (JCO) 4 leh non commissioned officers & other ranks 97, a vaiin 102 an awm dawn. Tunah hian company khat ami tur 72 (officer & other ranks) lak an ni anga, a bak 30 chu Assam Regiment atang hian a kaihruai tur an rawn awm phawt dawn. A hnu zelah Mizo hlang ni turin a tahtawlin an hnawh chho hret hret dawn a ni.
Territorial Army hi Indian Army pangngai duty-na ang chi ah a tul huna chhawk thei tura duan a ni a, ‘military reserve force’ an ni. Ram venhim bakah chhiatrupna thlen thulha che thei tur leh a tul huna regular army pui thei tur a ni.
Zawhna chhangin Lt.Col. Clement Lalhmingthanga chuan, TA awmna tur hi an la tifel loa, Lungleng khawtlangin ram an pek phal chu an en tawh a; Champhai, Vairengte leh a dangah pawh ram pe phal an awm a, la en zel an tum tih an sawi.
Mizo Territorial Army Mizorama piang leh seilian ngei an nih theihnan residential certificate leh tul dang phut a ni dawn tih a sawi bawk.
8 Training hi Assam Regimental Centre Shillong-ah an nei anga, thla 6 chhung a ni ang.
8 Sipai pangngai hi pawl 10 pass chin tan dil theih a ni a, officer bik erawh all India competion tur niin, officer leh other ranks hi kum 18 -42 inkar tan dil theih a ni.
8 Ruahman chhin ang chuan TA atana sipai lak hi kumin July 26-ah Aizawl district tan tan tum a ni a, July 27-ah Champhai leh Siaha district tan, July 28-ah Mamit leh Serchhip, July 29 Kolasib leh Khawzawl, July 30 Lunglei leh Lawngtlai, July 31 Saitual leh Hnahthial tan a ni ang. August 1 hi tul dang a awm takin ‘reserve day’ a dah a ni. Aizawlah vek lak tur a ni.