Mizo tleirawl 2 telna India chak zawn phawt

Mizo tleirawl 2 telna India chak zawn phawt
Argentina ram Rosario khuaa Four Nations Tournament khel mek Indian Junior Womens’ Hockey team chuan match hnih an khelh tawhah hnehna an la chang ve ve.
Hnahthial player Rinpuii leh Kanghmun South tleirawl Tluangi telna Indian junior team hian Pathianni khan an match hmasaberah 2-1-in Chile an hneh phawt a, nimin, Thawhtanni khan 3-2-in Luis Suarez-te ram Uruguay an hneh leh.
Chile an hmachhawn tum khan India tleirawlte’n si phur hmasa zawkin, 2nd quarter minute 20-naah Jeveria Seenz chuan India goal-ah a hlaplut a, hei hi South American team goal neihchhun a ni zui ta nghe nghe.
India erlet tan 3rd quarter minute 39-naah Sukhveer Kaur chuan an siphurh sutna goal thunin, 4th quarter minute 58 a herchhuah rualin Kanika Siwach chuan India chakna goal a thawh zui ve leh.
Tarlan tak angin, nimin khan India hian Uraguay an tum zui leh nghal a; India goal khatna hi minute 21-naa Sonam tihluh niin, goal hnihna leh goal thumnate hi minute 46-na leh minute 50-naa Chile lakah pawh goal lo khung tawh Kanika Siwach thun ve ve a ni.
India team hian naktuk, Nilaini hian an match thumnaah tournament thlengtu Argentina an hmachhawn dawn a, hei hi an tan fiahna lian an tawh hmasakber a ni ang.