Mizo Zaimi Insuihkhawm Pawl an inkhawmpui

Mizo Zaimi Insuihkhawm Pawl an inkhawmpui
Mizo Zaimi Insuihkhawm Pawl (MZI) chu Ningani leh Zirtawpni khan Aizawlah an inkhawmpui a. Website an siam an tlangzarh bakah hruaitu thar an inthlang.
Zirtawpnia inkhawmpui hmanpuitu Art & Culture minister C Lalsawivunga chuan MZI-in kum 44 hmel a hmu thei chu pawl zahawm leh ropui tak a nih zia tilangtu nia a hriat thu sawiin, an pawl inzarpharh dan chu entawntlak hlea a hriat thu a sawi a. Zaimite insuihkhawm pawl a nih piahlamah, thangthar zai lama tuite tana hun leh hmun siamsak tura ke pen thin, hla phuahtute, zaipawl leh band chi hrang hrang chena an lenna huapzo pawl a ni chu ropui a tih thu a sawi.
Zaimite chu Mizo hnam nunphunga bet tlat, zai ngainatna chawilar leh khawvel hriata pho chhuah tlaka tihhmasawn kawnga ke penho puiah sawmin, thu leh hla chuan sakhuana thlengin mi rilru a khawih theih avangin khawvel mithmuhah zaimite chuan Mizo hnam an pho chhuah theih a ring tih a sawi bawk.
Ningania hmanpuitu minister PC Vanlalruata chuan, sports leh entertainment dang dang pawh tuipui tam tak awm mah ila, Mizo zawng zawng kan inlungrualna chu rimawi leh zai a ni, tiin, zaimite hmasawnna leh hamthatna tur kawngah sawrkar leh MZI tanho zel tul a tih thu a sawi a ni.
Nikuma MZI rorel inkhawm leh kumin inkhawmpui inkara MZI member chatuan ram pan ta mi 14 sunna hun hman a ni.