Mizoram a Cricket hmasawn chhoh dan

India rama infiamna ngaihluthlawh leh sum tamna ber chu Cricket a ni a. India ramah chuan Cricket thiam nih chu hausakna leh larna a ni. India rama infiamna lar ber a nih vang leh sum tamna ber a nih miau vangin Mizoramah pawh Cricket in hma sawn chak viau. Mizoram a Cricket hmasawn chhoh dan kan thlir zau ang.
Hmasawnna lamtluang
‘Vai vawm’ tia Cricket lar harna Mizoramah hian kum 1992 khan Cricket pawl – Mizoram Cricket Association (CAM) din a ni. CAM hian hun rei tak chhung chu an mahni kal kalin an kal a, beisei leh an duh angin hma an sawn chak thei lutuk bik lo. Kum 2018-19 season atanga khan Board of Control for Cricket in India (BCCI) ah an inziak lut a. BCCI atanga fund an hmuh hnuin an hmasawnna hi a zuanin a zuang a ni ta ber a. Tunah chuan kum khat chhunga an budget ringawt pawh Mizoram sorkar hnuaia Sport Budget pumpui aiin a tam hial tawh nghe nghe a ni.
BCCI-a an inziah luh hnuin CAM hian BCCI hnuaia inelna hrang hrang an hmachhawn ve tan. BCCI hnuaiah hian kum tin inelna hmachhawn tur 15 zet a awm a. Heng inelna hrang hrang te hi mipa lamah category pali leh hmeichhe lamah category pali ten an hmachhawn thin. Mizoram hian inelna an hmachhawn tirh chuan an bangboin dan leh dun pawh an hre lo hle thin a. Hmeichhe lamah phei chuan indaih hleitheih loh changte an nei hial thin. Bo leh zum takin bul tan bawk mah se 2025 a nih meuh chuan team tha pawl tak niin champion na pawh an nei ta hial nghe nghe a ni.
Kum 2025-26 season-ah hian inelna 13 an hmachhawn zo tawh a. Inelna 13 an hmachhawn atangin inelna paruk ngawtah final an lut a. Inelna pahnihah an champion hial nghe nghe a ni. |um khat chu final lo lut ve zeuh tawh mah se an la champion ngai reng reng lova. 2025-26 season ah hian tui let hnu lama a vawi khat nan inelna pahnihah an champion ta a nih chu. Mizoram Under 19 team te an champion na Plate Group hi state level inelna hniam ber a ni a. An champion vangin season tharah chuan inelna sang zawk Elite Group an hmachhawn ang a. Player tha zawk te nen inelna sang zawk an hmachhawn dawn tihna a ni. Elite group hmachhawn phak tak Central hna lak hrang hrangh reservation a awm ve thin a, inelna sang zawk hmachhawn hi Mizoram tan a that piahah player ten an tangkaipui thei viau dawn a ni.
Mizoram Cricket Associatio hian Ramhlun Sport Complex-ah Cricket zirna changtlung tak; Mizoram Cricket Academy (MCA) an nei. MCA a lut tur hian Cricket club hrang hranga player tha bikte leh CAM in Samagra hnuaia an thawhpui School hrang hrang 13 atanga player tha zualte an la khawm a. Anni hi Mizoram team ni turin uluk taka hrual an ni. Anni bakah hian mipa lamah Under 16 bakah hmeichhe lama Under 15 leh Under 19 team te an enkawl bawk.
MCA-ah hian mipa 40 leh hmeichia 40 enkawl mek an ni. Zing dar 6:00 – 7:30 thleng training neih thin a ni a. Tlai lamah school ban hun dar 4:00 – 6:00 thleng training an nei thin. Hei bakah hian School chawlh laiin match an neihpui thin bawk. MCA hi head coach bakah Bowling Coach, Batting Coach leh fitness trainer ten an vil reng a, Professional Physio in a uap reng bawk. MCA a kalte hi player tha lawrkhawm an ni bawka a thlawn vekin zirna pek an ni a. An hmanruah zawng zawngah CAM in an tumsak a ni.
Hlawh chungchang
Cricket-ah sum a tam tih kan hre thum a, engtiang taka tam nge tih leh engtiangin nge hlawh an neih thin tih erawh kan hre thuk lo mai thei. Kan hriat thuk loh vangin hriat kan chak a rinawm. Mizo Cricketer ten engtin nge hlawh an neih tih an bihchiang ang.
Mizoram Cricket Association (CAM) hian an mahni atangin Mizoram player te hlawh an pe ngai lova, Mizoram aiawha fehchhuak ten BCCI atangin match money an dawng thin zawk. Hmeichhe lamah senior team te hian Mizoram aiawha One Day an khelhin match khatah Rs. 50000/- an hlawh a. T20-ah match khatah Rs. 25000/- an hlawh ve thung. Under 23, U19 leh 15 player ten match khatah Rs. 25000/- zel an hlawh a. First 11 chang lo player pali ten first 11 te hlawh zat ve, Rs. 12500/- zel an hlawh thin bawk.
Mipa lamah Under 16 player ten ni thum an khel thin a, match khata Rs. 14000/- zel an hlawh bakah nitin Rs. 7000 zel an hlawh thin bawk a. Ni thum chhungin Rs. 63000/- an hlawh zel tihna a ni. Under 19 player ten One day (ni 4) an khelhin nitin Rs. 20000/- zel an hlawh a, ni li chhungin Rs. 80000/- an hlawh phak. Under 23 player ten ni 1-ah Rs. 25000/ zel an hlawh a, ni li chhungin 1lakh an hlawh phak. Mipa senior team in format pathum; T20, One Day leh Multi days an khel thin. T20-ah hian match 1-ah Rs. 20000/ zel an hlawh a. One-day-ah Rs. 40000/- zel an hlawh thung a. Multi days-ah hian nitin Rs. 1.6 Lakh an hlawh.
Hetianga hlawh an neih thin bakah hian State inelna lian Ranji trophy-ah match 21 khel tawhte hlawh a pung ve leh bawk a. Ranji Trophy-a match 21 khel tling tawhte chuan One-Day macth khatah Rs. 50000/- zel an hlawh phak tawh thin a. Multi-days-ah nitin Rs. 2 lakh an hlawh phak hial bawk a ni.
Cricketer ten hlawh an lak hrang hrang kan tarlan atangin hian Mizoram tana khelh phak ringawt pawh eizawnna tling a ni tih a chiang a. Inelna sang zawk, India aiawha khelh phakte, Indian Premier League (IPL) hmachhawn phak phei chuan hausak thur thur hma bak a ni ber tawh. Mizoram atangin Jehu Anderson hi Cricket-a thleng sang leh sum la lut hnem deuh bera ngaih a ni a. Ani hian Mizoram tana a khelh thin bakah England first division league a khel bawk. Jehu Anderson bakah hian Joseph Lalthankhuma pawhin England first division league a khel ve ta bawk. Hmeichhe lamah Mizo zinga Century siam hmasa ber, inelna pahniha ‘Player of the Series’ ni thei Tlangnuam Vengthar tleirawl; Vanlalruatpuii hma lam hun a eng viau bawk. Kan tarlang hrang hrangte bakah hian Mizo zingah player beiseiawm tak tak an awm nual bawk. Hengte hi CAM thawhrim rah leh an hmasawnna zel a ni.