Mizoram an chak zawn

BCCI Vijay Merchant Trophy Plate, U-16 mipa inelna Match hnihna chu December ni 12-14 chhunga khelh niin Mizoram chuan Sikkim chu wicket 4-a hnehin a vawi hnih nan an chak.
Surat, Gujarat-a inkhelah hian toss-ah Mizoram chakin vawm hmasak an thlang a. Sikkim-in over 65 chhungin run 191 an siam. Ramhlun Venglai rawlthar pahnih KC Lalpekhlua leh K. Vanlallawmkima ten wicket 2 ve ve an la a, Henry Lallawmzuala, Pankaj Kumar Thapa leh Vanlalremsanga ten wicket 1 theuh an la bawk.
Mizoram vuak hun a thleng a, over 59.2 chhungin run 179 an siam. Captain K. Vanlallawmkima’n run 68 a siam a, Joel K. Lalthlamuanpuia leh KC Lalpekhlua ten run 30 ve ve an siam bawk. Lalduhsaka’n run 17 siamin Rammuanpuia Fanai-in run 13 a siam ve bawk.
2nd Innings-ah Sikkim lamin run 130 an siam a. Mizoram tan Henry Lallawmzuala, Joel K. Lalthlamuanpuia leh Pankaj Kumar Thapa te chuan wicket 3 theuh an la a, KC Lalpekhlua’n wicket 1 a la bawk a ni.
Mizoramin bat ve lehin an target chu over 62.5 chhungin an umpha a, run 143 an siam a, wicket 6 an hloh a, Wicket 4 in hnehna an chang a ni. Mizoram tan Henry Lallawmzuala’n out lovin run 60 siamin, K. Vanlallawmkima’n run 40 a siam bawk.
Mizoram hi vawi hnih an chak zawn ta a, final an hnaih leh zual. Ni 18-20 December chhungin Jammu and Kashmir nen an match thumna an khel zui leh ang.