Mizoram an champion

BCCI hnuaia T20 inelna, Syed Mustaq Ali Trophy – Plate Final chu December 6, Inrinni khan khelh a ni a, Run 10-a Sikkim hnehin Mizoram chu a vawi khat nan an champion.
Pune-a final khelah hian toss-ah Sikkim chakin vawm hmasak an thlang a. Mizoram-in over 20 chhungin wicket 9 hlohin run 148 an siam. Mizoram tan hian outstation player KC Cariappa chuan ball 18 lek a hmachhawn lai atangin run 52 zet a siam a. Cariappa hi ‘Player of the Match’ ah thlan a ni nghe nghe. Cariappa bakah hian Ramhlun Venglai tlangval pahnih K. Vanrotlinga leh Johan Lalbiakkima ten an khel tha dun viau a, anni pahnih hian run 54 lai an thawkchhuak bawk. Anni bakah hian Hunthar tlangval B. Lalnunfela’n run 21 rawn thawh chhuah puiin midang erawh double digit siam tling an awm lo thung.
Mizoram in an vuak zawh hnuin Sikkim vuak hun a thleng. Mizoramin ?ha takin an vawm thei a, B. Lalnunfela leh Karthik CA te’n wicket 2 ve ve an la. Sikkim in champion turin run siam an mamawh zia an hria a, run siam an tumruh hle. Run siam an tum luatah run out tum thum zet an neih phah a, hei hi Mizoram in an chhawr tangkai. Game inbuktawk takah Sikkim hian Over 20 chhungin run 138 an siamm a, wicket 7 an hloh. Group match a an hneh tawh Mizoram hi hneh nawn leh tum viau mah se run 10-in an umphak ta lova, Mizoram chu a vawi khat nan an champion zui ta a ni.
Cricket ah Mizoram in hma a sawn a, bung thar a kai zel. Senior Category-a a vawi khat final an luhnaah an Champion nghal a, season tharah Elite Group-ah an khel tawh ang. October thla khan U-19 hmeichhia te T20 ah an lo Champion tawh bawk a ni.