NEXA GIG Motors MBA Official Championship 2024 khelh zawh takah Ramhlun Venglai star Sainunmawia (Sihphir Badminton Club) chu singles category pahnih leh doubles category pakhatah a champion a, he tournament-a player hlawhtlingber a ni.
Mizoram Badminton Association leh Tata Trusts (NEIDA) thawhhona kaltlanga buatsaih he tournament hi June ni 25-29, 2024 chhung khan Ramhlun Indoor Stadium-ah khelh niin, tel tuma hming pelut zawng zawng mi 279 zinga player 215 zetin tournament an khel.
State championship hi Badminton Association of India (BAI) calendar-a lang pha tournament a nih avangin ngaihhlut a hlawh a; tournament khel turin Mizoram pawn leh chhunga academy hrang hrang atangin player an pungkhawm.
Tarlan tak angin, tournament khel pawh an thahnem hle a, match 264 lai awmin, official junior championship-a tel an la tam ber tum a ni.
He tournament-ah hian Mizoram player thate chu an tel kim hle a, chu’ng zinga hming langsar ber chu Sainunmawia Sailo a ni.
Mawia hian under-17 boy’s singles leh under-19 boy’s singles-ahte champion thei tura beiseiawm Malsawmhlua leh C. Lalramsanga chu deciding game-ah a hneh ve ve a; under-19 boy’s doubles-ah Vanlalpekhlua Sailo nen tangdunin lawmman pahnihna an dawng bawk.
Malsawmhlua (Mama), Serchhip, Ralte Villa BC chu category pathuma final lut thei a ni bawk.
Mama hi doubles specialist niin, a telna boy’s doubles category pahnih U-17 BD leh U-19 BD-ahte a champion a, U-17 boy’s singles-ah Mawia hneh loin pahnihna a ni thung.
Hmeichhe lamah Kolasib naupang duhawm Tirza Lalremruati, North Kolasib GSA chuan category pathumah final a lut bawk a; he’ng zingah hian U-13 girl’s singles leh U-13 girl’s doubles-ah champion-in, U-15 girl’s singles-ah pawh pahnihna a ni.
Hmeichhe lama inelna hautak ber U-19 girl’s singles-ah Lalrinkimi, Mission Veng Badminton Academy chuan Lalrempuii, Ralte Villa BC chu deciding game-ah a hneh bawk.
He tournament-a doubles champion thei zingah Mesak Lalrawngbawla, Ralte Villa BC hming a langsar hle bawk a; U-15 boy’s singles leh U-15 boy’s doubles-ah a champion kawp a ni.
Denis Romawia Rivung, Chaltlang BC pawh category pahnihah tho champion-in, U-13 boy’s singles leh U-13 boy’s doubles champion no mawi a chawi.
Tournament kharna inkhawma khuallian Jeje Lalpekhlua, MLA chuan Mizo naupangte’n sports lamah talent an neihthat thu sawiin, India ram champion ni mek leh la ni thei turte zinga awm chu nuam a tih thu a sawi.
India international hlui hian hlawhtling tura thuawih pawimawhzia te, midang aia nasaa thawhrim a pawimawhzia te, beidawng loa beih hram hram pawimawhziate a tawnhriat atangin a sawi a, hlawhtlinna engpawh chang se, an chawrchhuahna theihnghilh lo turin kalkhawmte a chah bawk.
Kharna huna thusawitu dang Women and Child Development Director Zoramthangi chuan MBA tournament liana hmeichhe naupang tel an tam chu lawmawm a tih thu a sawi ve bawk.
Naktukah result kimchang tarlan tum a ni.
Mizoram badminton tournament lianah Sainunmawia Sailo a langsar ber
Get real time updates directly on you device, subscribe now.