Mizoram Basketball League 2024 hmawrbawk a ni

Mizoram Basketball League 2024 hmawrbawk a ni
August ni 16 atanga khelh tan Mizoram Basketball Association (MBBA) buatsaih MBBA League 2024 chu karliamta Zirtawpni khan Hawla Indoor Stadium-ah zawh fel niin, Mizoram Super League team pariat zingah Zarkawt BCA chuan league round lama an hneh loh zet tawh (league phase-a pakhatna) Khatla TBL hnehin an champion.
MBBA League inelna neih zawh tak hi chi thumah then a ni.
Inkhel inhneh tawk takah, Mission Veng Hotshots BC (league phase-a pakhatna) chuan Chhinga Veng BC chu hun pek belh (overtime)-ah hnehin, D League champion an ni.
Hmeichhe lam inelna Women’s League-ah Team Alpha, Dawrpui chuan 74-63-a Bungkawn LB Associates (league phase-a pakhatna) hnehin an champion bawk.
MSL team pariat inelna hautak zetah Zarkawt BCA chuan tualchhunga an elpui kumhlun Khatla TBL chu tarlan tak angin league round-ah an captain Matthew Sailo tel lovin hneh lo zet mah se final inkhel tang takah erawh 76-54 hnehna an chang.
Ramthar tlangval Zonuna chu dan pangai angin a khel tha leh hle. Zarkawt BCA hian an squad neih chhah chu an chhawr hle bawk.
Lalrina Renthlei inhliam deuh mah se MSL 9 MVP R. Lalnunpuia (R-a) leh Matthew Sailote’n an hna an tlin.
An champion chungchangah hian BCA owner Miss Faki chuan, “Lang lo lama rim taka darkar tam kan naute thawhrah leh kan inlungrualna Pathianin malsawmin, nomawi kan hlawhchhuah theih phah,” tiin a sawi.
Khatla TBL hian tunhnaia inelna pathum final-a an hneh loh Zarkawt BCA hi hneh ngei turin thapui nen MBBA Cup-ah chuan rawn inlan an tumruh viau a rinawm.
MBBA hnuaia division sang ber dawttu D League-ah hian club pariat awmin, final inlehthaltawn zak zak karah Mission Veng Hotshots BC chuan Chhinga Veng BC chu hun pek belhah 77-72-in an hneh.
Hotshots hian nomawi hi an club din tirh ata an la chawi ngai lo va, kum 7 an tlin chamah chiah champion trophy hi an hlawhchhuak.
MSL semi-finalist hlui club hian an club puipate zinga chatuan ram pan ta – Liansangzuala (Lsa), Zoremsanga, Zothanpuia Hnamte, Lalhlimpuia Hmar leh R. Lallawmzualate tan he an hlawhtlinna hi an hlan a ni.
“|halaiten humsual dai lo va, hlawk zawk leh awmze nei zawka basketball an khelh theihna’n Hotshots Club hi din kan ni a, kan beisei ang result tha kum 7 hnua kan hmu hi thinlung takin kan lawm,” tiin an club puipa zinga mi Amuana chuan an club history-a champion trophy an dawn hmasak ber thu a tarlang.
Hotshots head coach Lalnunsanga Ralte (Lana) paw’n, “Tun tum hi kan innpuahchah danah duh angin kan kal thei lo va, inter school-te a lo tlazep ve nen court kan chang mang lo na chungin kan tih chhunah theihtawp kan chhuah tlang a, inkhelh loh karah match review-te kan nei thin – hei hian nasa takin min pui.
“Player-te thawhrimna leh inpekna hi kan champion-pui a ni ber e. Player pariat chiah ni chunga D League kan champion thei hi thinlung takin ka lawm takzet. School kal, exam leh test vanga final thleng lo tel thei lo te, inhliam kan nei leh zel nen. D League road to MSL khelh huna full squad a nghahhlehawm khawp mai.
Transfer-ah player 2/3 beisei ruk kan nei bawk a, team-in hma kan sawn ngei kan beisei. Club owners (thianho) inpekna a ropui takzet. Vawikhat champion-na a ni bawk nen, Ls-a te an ngaihawm khawp mai…” a ti.
Hmeichhe lam inelna Women’s League-ah hian club pangate’n final luh an inchuh a, a tawpah Mizo hmeichhe zinga basketball huanga player tha zinga sawi hmaih theih leh thiang lo, Puii leh Chhamite’n Team Alpha, Dawrpui tan nomawi an chawi.
Bungkawn LB Associates tan hian hun tawp hnaih tawh lama players foul out an awm kha an chak loh chhanah a puh theih ang.
Chawngi leh a thiante’n lasi thawnthu angin an vanneihna an khar thei rih ta lo a ni.
Dawrpui Alpha coach, Mission Veng tlangval Ahruaia chuan, “Pathian malsawmna kan dawng nasa em em a, Team Alpha, Dawrpuite hi team tha ber kan ni lo va. Team thenkhatte nena intehkhin phei chuan squad pan pawl tak kan niin ka hria, mahse, kan naute a awm ang angin theihtawp an chhuah a, a rah kan seng a ni ber mai.
“Kan team-a kan senior player-te’n min uap tha em em a, inkhel tam lua lo mah se team min tiphuisui hle. Anni bakah kan captain Puii leh vice captain Chhamite’n court-ah player naupang zawkte an kaihruai hneh bawk a, naupang zawkte pawhin hma an sawn phah hlein ka hria.
“Sawi hmaih theih loh chu – club owner Sir Papuiate chhungkaw inpekna a lawmawm takzet a, anni vanga tun dinhmun thleng hi kan ni.”