Mizoram boxing hruaitu pawimawh Sangzuala vuiliam a ni

Mizoram Boxing Association (MIZBA) vice president hna a chelh mek laiin Albert Sangzuala, kum 50 mi chu nimin zing dar 4:10 khan a thi a, nimin vek chhun dar 1-ah Mission Veng Presbyterian Kohhran Sunday School Hall-ah an vui a, Mission Veng thlanmualah zalh a ni.
Sangzuala hi boxing tuipuitu niin, ram chhung leh pawn lam thlengin hnuhma thahnem tak a hnutchhiah rualin lawmman pawh chi hrang hrang a dawng hnem hle a, kan hriat theih china a lawmman dawn tawhte chu kum 1989 khan Quilon, Kerala-a 5th National Championship (Sub Junior)-ah gold medal awrhin bul a tan,
A kumleh Jabalpur, Madhya Pradesh-a 6th National Boxing Championship (Sub Junior)-ah gold bawk awrh lehin, kum 1990 vek khan New Delhi-a YMCA All India Boxing Championship-ah gold a hnekchhuak leh bawk.
Kum 1994 khan boxing a thiam em avangin Mizoram Police-ah lakluh niin, hemi hnu pawh hian ram chhung leh pawna boxing ring chhung leh pawnah hnuhma hriatreng tlak a hnutchhiah zui zel a ni.
Boxing-a a thawhhlawk em avang hian a chenna Mission Veng Branch YMA pawhin kum 1998 khan Mission Veng Award an hlan hial a; a hnu lamah chawimawina Nopui pawh an dawtir bawk.
Kum 2004 khan Mizoram Boxing Referee and Judges Examination tha takin a paltlang a, Mizoram Boxing Association-ah hian hruaitu hlun tak a ni zui zel a; kum 2023 atang khan vice president hna chelh tanin, he term hi kum 2026 thleng awh tur a ni.
Kumin May thla khan National Referee and Judges chu Dimapur, Nagaland-ah tha takin a pass leh a ni.
Albert Sangzuala hi Mizoram boxing-a referee and judge-te zinga tha ber pawl niin, a thihna hi Mizoram boxing tan chhan lian a tling.