Mizoram chak Puduchery hmaah khawchhak basketball a lum!
Mizoram chak
Puduchery hmaah khawchhak basketball a lum!
75th Junior National Basketball Championship, Ludhiana (Punjab) a September ni 2 atanga ni 9 thleng neih tur chu nimin zing khan khelh tan a ni a, India rama basketball boruak lenna ber state Mizoram chuan an game hmasa berah Puducherry chu 67 – 65 in a hneh nghal!
Tun tuma Mizoram tumpui Poducherry hi France in a lo awp reng tawh a nih avangin ‘India’s Little France’ tih an ni a. France sawi takah chuan khawvel indopui pakhatna (1914 – 1918 ) ah khan France rama German raldo turin Mizo tlangval 2,000 chuang an thawkchhuak a – khang Mizo val rualte kha ‘Feren ram kal’ tih an ni a, Lushai Corps tih hmingpu in France (Feren) ah an rammu a nih kha. France ram awp tawh Poducherry hma ah France rama Mizo val huaisen thlah kal zel Mizoram basketball team in hnehnado an chham a ni ber e.
Infiamna in hnam a phuarkhawm thin a, chu chu nimin (September ni 2) khan a thleng nawn leh.
Mizoram team inkhel en hian Mizoram basketball inrelbawlnaa thuneitu sang ber MBBA executive committee WA group chu inkhel boruakin a tuam hneh hle.
Player nu leh pa te bakah Mizo hnama chiang, a bikin basketball ngaina tawh phawt chuan Basketball Federation of India Youtube channel atanga inkhel pekchhuah hi an thlir rawn thup a, awlsam taka chak mai tura ngaih Mizoram hi hun tawp lama an talbuai avangin he team tantu lam hi an hlauthawng hman viau – ni nga chhung zet zin kawnga thang Mizoram erawhin an phu ang ngeiin hnehna an chang ta tho, point hnihin!
Inkhel chungchang bih thuak ila: Mizoram player Jacob-an ball chan tuma a tluk chilh rap rap khan a teammate-te tan phurna a thlen tih a lang – rebounds an la nalh nalh zui.
Free throw erawh team pahnihin an harsat a, ball mawl a awm nual bawk! Match official lamin ‘travelling’ an ham hnem malh malh hle. Pumruaah an intiat thawkhat viau a, game awmze neia khel zawk Mizoram chevel erawh a mawiin ball an khawih pawh a dak thlarh zawk.
Team manager Richard Lalropuia chuan, “Player-te practice mumal hman lova zin kawnga kan thang rei avangin duhthusamin kan game hmasa ber an khel chhuak zo lova; amaherawhchu, chaka bul kan tan hrim hrim hi a lawmawm hle” tiin The Aizawl Post Hoops Mania a hrilh.
Head Coach KC Maliana hian a player-te chungah rinna nasa lehzual zawka nghatin insiam remna tur hun tha an neih hi a bawhpelh a rinawm loh!
Inkhel tawp ber quarter-ah point 10 chuangtea hman an hruai tawh hnua an talbuai zeuh erawh a pawi hman tep a, he coach tawnhriat ngah hian Mizoram game siksawi kawngah fim zawkin ngaihtuahna a seng ngei ang.
Mizoram Vs Puducherry
1st quarter
12 – 15
2nd quarter
36 – 30
3rd quarter
47 – 41
4th quarter
67 – 65
Most points Mizoram
1. Lalrinchhana – 18 pts
2. Emanuel Lalepkhlua – 14 pts
3. Roney Vanlalawmpuia – 11 pts
4. Joel Lalbiakhlua – 11pts
Inkhel leh hun tur
1. Mizoram Vs Gujarat – 9:30 am
September ni 3, 2025
2. Mizoram Vs Goa – 8:15 am
September ni 4, 2025
3. Odisha Vs Mizoram – 7:30 pm
September ni 4, 2025