Manipura Zohnahthlak hnam kau peng hrang hrangin inlungrual zawka hma an lak theihna atana an din Zo United chuan an state-a buaina an neihnaa Mizoramin a puihna leh dawnsawn dan zawng zawngah an lawm hle tih an sawi.
Manipura Zohnahthlak unau, kau peng chi hrang hrangte chu an state-ah chengza in, an hnam ziarang leh tawngbil humhalh leh chawinung tlangin an chengho a, hemi kawngah hian an inunauna leh lungrualna turah harsatna an tawh phah chang a awm thin a; tuna Manipur buaina kal zelah Mizorama NGO Coordination Committee kaihhruaiin Manipur Zohnahthlak hnam peng hrang hrang hruaitute, sawrkar nena inkahhaina thuthlung hnuaia awm mek pawlte, Zohnahthlak MLA leh minister-te tel kim vekin Aizawla inhmukhawma an sawiho hnu ah ro an rel tlan theihna tur Zo United hi lungrual taka an din tih an convener Albert L Renthlei chuan a sawi.
Mizoram sawrkar, kohhran, NGO, chanchinbumi, youtuber leh Mizoram mipuiin an lainatna leh khawngaihnaah lawmthu sawiin, ropui an tih thu a sawi a. Harsatna an tawh mek laiin, Central YMA president-in lungngai lo tur leh theihtawp chhuaha tuamhlawm an nih tur thu a sawi chu an thlamuanpui hle tih a sawi.
Hetihlai hian an zingah dan loa thil tihna kawnga inhnamhnawih leh manchhuah an awm thin chu pawi an tih thu sawiin, Zoram mipui ngaihdam an dil tih a sawi a ni.
Zohnahthlakten an duh loh leh an tum hauh loh kawngah an chenpui Meitei-ten chuan an nawrlut tih Zo United convener hian sawiin, thliarbik nei loin Kuki Zo tiin suat mang vek an tum a. Ralah puangin rawva taka an che tih a sawi.
Zawhna chhangin, Zo United chu Manipur Zohnahthlak peng hrang hrangte kal zel dan tura thuneitu emaw reltu emaw tura din a ni loa, tuna an buaina kaihhnawiha pawl hrang hrang khaikhawmtu, mumal leh fel zawka chet an lak a, aw an neih theihna atana din mai a ni tih an sawi.
-- Advertisement --
Kumin May 3-a Manipur buaina chhuah hnua Zohnahthlakte dinhmun:
4Khaw 203 halsak an ni tawh.
4Chenna in 8166 halral sak an ni tawh.
4Biak in 266 halral sak an ni tawh.
4Kohhran office leh quarters 94 tihchhiat sak an ni tawh.
4Mi 142-in nunna an chan tawh.
4Mi 60000 chuangin an chenna an rauhsan tawh.
4Relief camp 168 ah an awm mek a, natna avangin camp-a awm 41 an thi tawh.
4Thi nia an finfiah tawh mi 13 ruang hlawm theih lohin a la awm.
4Buaina chhuah ni atanga biakpawh theih loh leh chin hriat loh pathum an awm.