Mizoram Fish Festival nei

National Fisheries Development Board-in PMMSY sum hmanga a bultum, ni hnih awh tur Mizoram Fish Festival 2023 chu Ningani khan Aijal Club Park ah neih tan a ni a. Stall 10 awmin tualchhunga tharchhuah sangha tharlam leh bawma khawi chi sangha, Mizorama siamchhuahte bakah sangha kaihhnawih thildangte phochhuah a ni.
Festival hawngtu Fishries secretary C Lalzahngoa chuan tualchhung dil sangha khawitute leh sangha kaihnawih thila sumdawng thinte tan inphochhuahna hun tha buatsaih a nih avangin lawmawm a tih thu a sawi a. Tualchhung sangha tharchhuah a pun zel thu leh mipuiin kan tualchhung thar kan ngaihhlut deuh deuh thu sawiin, “Mahni ram tharchhuah ngei kan inhlutpui hian kan inpuitawn a ni,” a ti.
October 10 atanga December 18 thlengin Mizoram sangha an fuan hunlai (an inthlahpun lai) a nih avangin Fisheries department-in sangha man phal loh hun ‘closed season’ a a puan chu mipuiin ngaipawimawh a, lui sa man lo turin a ngen tih a sawi bawk.
Fisheries department hotute sawi danin, Fish Festival hi Mizoramah tum hnih buatsaihna a ni a. Mizoramah sangha dil hectare 5000 chuang a awm tawh a, district 11-a District Fisheries Office kaltlangin department chuan sangha khawitute tan hma an la a ni.
Festival hawnnaah hian Mizoram aiawha regional leh national level-a Best Fisheries Award dawng tawhtu mi pali – Hmangaihthanga, Serchhip (2018-a dawng); F Laldingliana, Champhai Kahrawt (2019); Lalzamliana, Buhchang (2022) leh Lalthanliana, Kolasib (2023) te hnenah lawmpuina thuziak leh sumfai hlan a ni.