Mizoram FOCUS

FOCUS 1.0 kan hmang zo a, kumin kum tir lam khan kan thlah liam a. Tunah FOCUS 2.0 kalpui leh turin Mizoram chu a insingsa leh mek ta.
Ei leh bara hmasawnna tur leh kut hna thawh chawikanna tura hmalakna kum 6 chhung kalpui FOCUS 1.0 (Fostering Climate Resilient Upland Farming Systems in the North East) -ah khan Project budget chu US dollar maktaduai 79.30 a ni a. Khatih hun kum 2018-a pawisa hlutna kha 1 USD=68 INR anga chhut a ni a, chu chu India pawisa chuan cheng vaibelchhe 539.24 a ni. Mizoram district pali Mamit, Kolasib, Champhai leh Serchhip-ah te kalpui a ni a, chhungkaw 64,500 huam tura tih a ni.
Tuna FOCUS 2.0 hi a project budget chu USD maktaduai 72.29 a ni a, tuna pawisa hlutna 1USD=85 INR anga chhut chuan cheng vaibelchhe 614.46 tihna a ni. Kum 6 chhung bawk kalpui tur a ni a, Mizoram district zawng zawngah khua 700-a chhungkaw nuaikhat leh singnga vel huap tura ruahman a ni. A sum hi International Fund for Agricultural Development (IFAD)-in 63.3% a tum dawn a ni.
Kan hman zawh tak FOCUS 1.0 kha ‘hlawhtling taka kalpui’ angin thlah liam a lo ni tawh a. Hlawhtling takin kan han ti thlazen thin a, a hlawhtlin dan (success rate) hi a mipui nawlpui lam hi chuan kan hre chipchiar lo thin khawp mai a. Kum 6 chhunga district 4-a kuthnathawktute chawikan nana cheng vaibelchhe 500 chuang hmanral tak khan eng hmasawnna nge a thawh chhuah tih atangin, tuna FOCUS 2.0 kan hman leh turah hian, hmalak dan tur pawh a hriatthiam theih deuhin a rinawm. Mahse, chutiang lam hawi chuan hmalakna ruahman a ni nge ni lo tih chu mipui lamin kan zu hre pha tawh lo.
Kuthnathawktute dawmkanna tur sum leh pai hi sawrkar laipui scheme hrang hrang hnuai atang hian kan dawng hnem malh malh ta hle mai a. Heng scheme-te hi ‘rural development’ atan a ni deuh ber a, tanpuina sum kan hmuh tam tawh ngaihtuah hi chuan, kan kuthnathawktute pawh changkang fe tawh awm tak an nih vei nen, an la pawr fap reng mai chu a ni a. A nihna tur ang hian sawrkar laipui atanga sum lo lut zozai hi hmang tangkai ila chuan, state hmasawn ber kan ni pha hial tawh tur a ni.