ENVIRONMENT HUMHALH

JC.Zoremi Hmar Joute

Khua a thâl chho a, khawi lai lai emaw chu a haltu ber hriat si lohvin a kàng leh ta duai duai mai! Kan ram neihchhun hi thâl a lo her chhuah apianga a kang ziah mai hi chu a pawiin, mi tin kan fimkhur a tulzia a lang niin ka hria.
Mizorama National highway sial thara NHIh an hnuaia contractor-te chet dan dik lo, leivung tam tak an paih avanga lui kang chat titih te, thing leh mau tichereu thei zawnga an chet avang leh, dan zawm lova nasa taka environment an suasam laia sawrkar a ngawih tlat vanga movement (Youth for Environment Justice Mizoram) hi lo piang ta kha a ni a, a tul phawt chuan environment humhalh leh ven him kawngah hma an la zel dawn tih an sawi a, thla an timuangin an fakawm tak zet a ni.
Khawvel lo changkang chho zelah thalaite an fing chho ve zel a, hmasawnna an duh rualin environment tichhe lo zawnga hmasawn an duh tihna a ni ta ber a. Heng kan thalaite thil vei hian a tha zawnga hma kan sawnzia, kan rilru sukthlekin ram leh hnam hmangaihna tak tak kan pawh tawhzia a tilangin ka hria. Nakin lawka kan ram kan hnam hruaitu turte chu tuna environment humhalh duhtu thalaite hi an ni dawn; tuna environment humhalh leh humhim a tulzia hretu an nih avang hian ram leh hnam tan hruaitu tha leh fing, tawngka chauh ni lova ram hmangaihtu kan nei thei dawn niin a lang a, a nghahhlelhawm phian mai na a, tuna he ram luah mektu leh roreltu kan sawrkar te nen nian, nakina humhalh tur alawi hnutchhiah kan lo nei lovang tih erawh hlauhawm tak a ni.
Khawthlang lam ram changkang ber ber te chu tunlai hian khaw lum nasa takin a tuamin a tibuai mek a, mi tam takin an thih phah tawh a. Ram vawta sawi England-ah meuh pawh khawpui ber London-a airport thenkhat chu khar hial ngai khawpin khua a lum a ni. Europe khawmualpui hi khawvela ram hausa leh changkang awm khawmna hmun a ni a, hmasawnna hrang hrang an duh luat vangin environment an dim lo va, boruak chhia siam chhuaktu industry tam tak a awm a, thing leh mau leh lui te, boruak tha siamtu lam an ngaihthah leh si avangin leh, khawsak nawmsak an tum luatah an tuar let mek a ni.
Mizoram pawh sik leh sa a danglam nasat tawh zia, khua a lum chak zia leh kan lui tui tam tak an kang chah hnem tawhzia te, kan bawlhhlawh paih duh danin a zir loh avanga lei min leh tui luanna thin ro ta thawt thawt mai te hi kan ngaihtuah ve ngai em aw! India rama khaw ro chak ber sawm thlan chhuah zingah telin, hmar chhak state zingah khaw ro chak ber nihna dinhmun kan luah mek a, Himalayan state zingah sik leh sa inthlak danglam avanga state dinhmun derthawng zingah pahnihna kan ni bawk a nia aw; ngawih mai mai hun a ni tawh lo tak zet a, kan ram, keimahni ta ngei, kan neihchhun ni bawk hi vei a, kan phâk tawkah theuh kan chet chhuah ve a hun ta tak zet mai.
Kum tin Green Mizoram day te hmangin thing kan phun thin a, kan MLA zahawm takte leh kan Minister te pawhin an phun lai TV-ah kan hmu fo a, a pawimawhzia ngaihtuah chuan thil lawmawm tak a ni. Ka sawi duh zawka chu thingkung pakhat than len nan hian a kum a kum fe nghah a ngai a ni tih hre miah lo ang maia kan thing leh mau puitling sa kan vât duai duai hreh lo te, kawng tha neih kan duh avanga kan nawr thlu rem rum a, dim lo baksaka kan suasam hreh lo hi mak ka ti a ni. Eng anga kawngpui tha leh zâu pawh nei ila, thing leh mau, kan lui tui te kan humhalh si loh chuan kan sawi tak Europe khawmualpuia ram tam tak chan khi kan chan ve tur tho a ni. Kawngpui tha deuha tawrhhlelhawm khawpa khaw lum tawrh ai chuan, kawngpui tha tak nei chunga zo thlifim leh lelthang zâi awihna hnuaia tual chai a nuam zawk fe ang.
India State of Forest Report 2021-in a tarlan danin Mizoram chuan 2019-2020 chhungin ramngaw sq.km 185.51 kan hloh a! Hei hi a chhan ni bera ka rin chu thingtlang lo nei ten lo an vah nasatzia te, sawi leh sawi hnu, kawng siamin thing leh mau an tihchhiat nasat lutuk vang te a nih ka ring. Hei hi engtia hma lak chi nge…kut hnathawktute hian kum tin ramngaw tha tha vât êng duai duai lo hian huan nghet nei zawk tura hma lak chi a ni ang em! Lo an nei a, anmahni kham khawp ngawr ngawr an thar chhuak táwk tâwk a. An ram vah chhiat hlut zawng teh chuan hlawk lo tak a ni. Tun laiah phei chuan mahni kham khawp pawh an thar meuh tawh lo lehnghal. Lo nei mi pawn vai buh tho an ei. Chu ai chuan huan hmun nghet nei se la, thlai chi hrang hrang ching zawk se la, leilet siam te pawh a tha hlei hlei. Chutianga ti thei tur chuan kan sawrkar chak tak hian kut hna thawktute hi kawng zawnpui mai chi a ni dawn lawm ni! Grape huan neitute a theih ang anga pui a, fuih sauh sauh a, an han thar chhuak ta chêng a, mansak leh daih ang ni lo hian!