Mizoram HIV: National average lêt 10 aiin sâng zawk

Tun hnaia chief minister hova Mizoram State Council on AIDS thutkhawmnaah HIV/AIDS chungchanga Mizoram dinhmun tarlan a nih dan chuan, puitling zinga za zela 2.73% te chu HIV kai, tih a ni a. India ram pumpui khaikhawma national average chu 0.2% a ni thung. Chumi awmzia chu, Mizoram hi national average let 10 aiin a sang zawk tihna a ni.
Hetianga Mizoram a san chhan hi Mizoramin HIV kai kan hmuhchhuah tam vanglai (peak level) a thlen tlai bik vanga ngaih a ni, tiin Council thutkhawmnaah hian tarlan a ni a. HIV kai nei tam state dangte chuan 2005 chhovah khan an peak level an lo thleng tawh hlawm a, Mizoram peak level hi 2017 khan a thleng ve chauh, tiin report a ni a. 2017 hnu lamah chuan kai thar hmuh chhuah zat hi a tlahniam zui ve hret hret tih a ni, bawk.
Tunhmain Nagaland leh Manipur te hi India rama record nei sang thin an ni a, tunah chuan Mizoram a sang ber ta a. Information hmuh theih chinah, tunah hian Nagaland chu 1.36% leh Manipur 1.05% an ni a. Manipur dawta sang fal leh deuhte hi Andhra Pradesh 0.67%, Telangana 0.47% leh, Karnataka 0.46% te an ni.
State dangte nen HIV/AIDS hi kan do tlang vek a, Mizoramah pawh HIV/AIDS dona langsar tak leh thawm na tak (Red ribbon football tournament adt.) kalpui a nih dan chu kan hre vek awm e. Hetih lai hian, NACO atanga tanpuina bak hi HIV/AIDS do nan hian state sum sihchhuah kan nei ngai meuh lo a tih theih ang. Nagaland-ah chuan an MLA-te’n HIV do nan kum tin an fund atangin cheng nuai hnih an pe ziah a, chu chu kan ram hruaitute hian an hria a, an sawi chhuak thin a, mahse ‘Nahaia lawh theih’ ang kha kan lo thei tlat lo a, kan heti zo ta a ni ber awm e.
Tunah hian MSACS chhinchhiah danin HIV vei ART damdawi ei 16,217 an awm mek a, HIV vanga nunna chan chhinchhiah 5021 an awm tawh bawk.
Kum 4 kalta (Feb 2020)-ah khan, Mizoramin natna kan hmachhawn lian zual pathum HIV/AIDS, Cancer leh COVID-19 chungchang hrilhfiahna MLA te puala neihah AIDS vanga thi zat kha 2,539 tiin tarlan a ni a. Tunah hian 5,021 an tling tawh a nih chuan, kum 4 chhungin AIDS vanga thi 2,482 an awm belh tihna a ni dawn a. Chuti a nih chuan AIDS vanga thi zat hi chawhrualin ni tin 1.7 tihna a ni; a rapthlak hle a ni!
Tunah chuan NACO hian HIV/AIDS dona atana tanpuina, tunhmaa min pek ang kha min pe ta lo a, Nagaland ang hian MLA fund hi hmang ve ta ila, HIV/AIDS a tlakhniam phah ve ang nge, awmzia a nei chuang lo ang? NACO atanga khatiang zat tanpuina kan dawng chung pawha kan sang tual tual zel a nih chuan, a sum lam ai mahin, HIV/AIDS do dan ‘strategy’ hi a pawimawh zawk chu ni tain a lang.