Ka theihtawp ka pe che u : Biden

Hun harsa tak karah Joe Biden-an thusawi a duh loh berte zinga mi a ni mai thei a. Mahse, chanvo inthlak danglam thut theihzia hrechiangtu ber chu President Biden a ni ngei ang a. A nun pum chu vanduaina leh harsatnain a tlakbuak nasat em em a ni.
Democratic National Convention zan khatna Chicago-a neiha thusawina a neihah Biden chuan a president hun chhunga a thil tih tam tak te chu tan tlatin kum 2020 a campaign laia an aupui te chu a tihhlawhtlin thu a sawi bawk a.
“Nangni ang bawkin, he ram tan hian ka thinlung leh thlarau ka pe a ni” tiin a sawi a, mipui pungkhawm tam tak te chuan ‘Kan lawm e, Joe’ tiin an lo chhawn let a ni.
Biden chu stage-ah a fanuin ko chhuakin a nupui Jill pawhin mipui te hnenah a pasalin presidential race atanga a inhnuhdawh a thlan hnuah ‘a thinlung ril tak a hmufiah’ tiin a sawi a.
A fanu Ashley a kuah hnuah a mittui a hru a. President chuan a lung zawnah kut dahin mipui amah lawm em emtute chu a nuih sang zui bawk a.
A thusawiah a vice-president, hmeichhia amah thlaka White House-a thu tura a duh bawk chu a fak hle bawk.
“In nominee ka nih veleha ka thutlukna siam hmasak ber chu Kamala thlan a ni a, ka career chhung zawnga ka thutlukna tha ber a la ni” tia sawiin, “A tough a, tawnhriat a nei tha a, integrity a nei tha bawk” tiin a sawi.
Oval Office atanga kar li kaltaa a thusawi ang lo deuhin Biden chuan generation thar hnena meichher pek lam a sawi lo va. Mahse, a message chu a sawi chiang thawkhat hle thung a. A thusawi zawh lamah Harris leh a pasal Dough Emhoff te chuan Biden leh a nupui Jill chu panin an kuah zui a.
“Ka hmangaih che” tiin vice-president chuan Biden a kuah pahin a sawi zui bawk.
Biden chuan a thusawi tam ber chu Harris kaihhnawih sawi nan a hmang a, November thlaa Donald Trump nena an inhmachhawn hunah history chu siamthat emaw siam danglam emaw a ni dawn tia sawiin chutih rual chuan thusawitu tam ber te chuan Biden an White House a luah laia a thutlukna siam tam tak te chu amah fak nan an hmang thung.
Kamala Harris pawhin thusawina neiin, “Joe, i kaihhruaina turu tak avang leh he ram tana i nun puma i inhmanna leh i inhman chhunzawm zelna avangin lawmthu kan sawi a ni” tia sawiin, “Chatuanin i laka kan lawm ang” a ti zui bawk.
A hnuah Delaware Senator Chris Coons, Biden ally ber pakhat pawhin Biden dakna sawiin, “Joe Biden aia midangte hrethiam ka la tawng ngai lo” a ti a, “Biden anga hlohna nasa tak tuara tichunga midang tam tak te tana hma lam hun eng siamsak ka la hre lo” tiin a sawi bawk.
Hillary Clinton pawhin thusawina neiin Biden chuan ‘White House-ah zahawmna leh thatna a tungding leh a ni’ tiin a sawi bawk.
Kum 2016 Demoactic nominee chuan American hmeichhia zinga president ni thei hmasa ber ni thei lo mahse leh lamah Kamala Harris chuan thutiam lain president nihna a chelh ngei dawn a ni a ti bawk.
Chicago-a Demoratic Convention hall chu a khat hneh hle a, president Biden-an lawmna leh a laka lawmna chu hmuh theihin a lang a, kum 1972-a kum 29 mi lek nia Congress a thlan tlin a nih atanga tun hun thlenga ram tana a thawhna chu hlutsakin a awm a ni.
Vawiin lamah Barack Obama chuan thusawina a nei dawn a, Bill Clinton pawhin thusawina a nei dawn bawk a. President hlui pahnih te hi term hnih thlan tlin ve ve an ni bawk.
Biden erawhin term hnih chelh thei turin hun tha a nei ve lo thung a, term khat chauh president niin tun hi major national event tlinga a thusawi hnuhnung ber a ni ta a ni.
A thusawi tawp lamah American Anthem chu sawi chhawngin, “let me know in my heart when my days are through, that America, America, I gave my best to you” tiin Joe Biden chuan a tlip a ni.