Mizoram hmeichhe hockey team inbuatsaih mek

anuary ni 28 atanga February ni 13, 2025 chhunga Uttarakhand-a nghah tur 38th National Games-a hockey tournament khel tur Mizoram hmeichhe hockey team chuan tun January ni 13 atang khan STC, Thenzawlah coaching camp an lut tan a, an inbuatsaihna pawhin a vawrtawp a thleng chho hnai tawh.
Nikum March ni 13-23 chhunga Pune, Maharashtra-a 14th Hockey India Senior Women National Championship-ah khan Hockey Mizoram chuan senior hmeichhe team a tir a, kha tournament-a quarter-final an luh zarah Mizoram hmeichhe hockey team chuan 2025 National Games-a hockey inelna an hmachhawn theih phah dawn ta a ni.
Squad-ah hian player 18 awm tur a nih laiin tun dinhmunah la thlitfim leh atan player 21 thlanchhuah phawt an ni a, an zinga pasarih – Lalremsiami, Marina Lalramnghaki, Lalrinpuii, H. Lalruatfeli, Lalhlunmawii, Z. Laldintluangi leh Vanlalrinhluite hian phaitual lama tournament dang an khelh mek vang leh harsatna dang avang tein camp an zawm ve thei rih lo a, Mizoram atanga kalte nen Haridwar pan turin Delhi-ah an inhmukhawm dawn a ni.
Mizoram team coaching staff lam hawi zui ila. Manager hi Durtlang nula, NIS chhuak hockey coach Rosalind L. Ralte (Atei) niin, stand-in manager atan Hockey Mizorama an joint secretary K. Lalchamreii ruat a ni.
Coach hi NIS chhuak tho, STC, Thenzawla Mizo naupang hrual mektu Lalrothuami (Bitei) a ni thung.
Bitei hi Inter SAI Tournament-a an naupangte a hruai rih avangin team manager tur Rosalind-i hoin coaching hi kalpui a ni.
Mizoram team hian February ni 1, 2025-ah Aizawl an chhuahsan ang a, hemi zan vek hian zan dar 11:50-ah Haridwar panin an chhuak leh nghal ang.
National Games-a hockey tournament-a team chhuak turte chu : Haryana, Maharashtra, Jharkhand, Madhya Pradesh, West Bengal, Mizoram, Manipur, Odisha, Karnataka leh a thlengtu Uttarakhand-te an ni.
Remchang hmasaberah Mizoram hmeichhe hockey squad hi rawn tarlan leh tum a ni ang.