Mizoram inthlan November 7 Pathianni-ah vote chhiar dawn

Election Commission of India (ECI) chuan Mizoram Legislative Assembly inthlan hun atan 2023 November 7 a ruat a; vote chhiar hun atan December 3 a ruat. ECI chuan Thawhtanni khan state dang pali telin Mizoram inthlan hun atan November 7 a ruat tih a puang a. Chuh tum tan November 20 thleng nomination thehluh hun atan ruatin, December 5-ah inthlan kaihhnawih zawng zawng zo fel hman turin a ruahman.
Mizoram chief electoral officer Madhup Vyas chuan inthlan hun tur puan a nih tawh avangin model code of conduct khauh taka kalpui nghal a nih tur thu a sawi a. Political party aiawhten Pathianni leh Inrinni ah vote thlak leh chhiar lo turin ngen mah se, state dang pali nen inang tlanga hun ruat a ngaih avangin Pathianni-a vote chhiar a ngai tiin thuthar thehdarhtute zawhna a chhang.
ECI chuan political party hrang hrang leh candidate turte chu an campaign-na hmunah hman khat daih plastic hmang lo turin a hriattir tih sawiin, Mizoram Police bakah Central Armed Police Forces chu inthlan chhungin hmun hrang hrangah an duty dawn tih a sawi a. Critical/ sensitive area/polling station zirchian mek a nih thu a sawi a; candidate turte chu an sum hman dan uluk taka endik a nih tur thu sawiin, ECI thuchhuak angin candidate-ten cheng nuai 28 bak an hmang thei dawn lo tih a sawi.
Kumin inthlanah hian ECIL-in M3 model an siam thar ber EVM/VVPAT hman a ni dawn tih a sawi bawk.

4October 4-a final electoral roll tihchhuahah Mizoramah voter 856868 an awm a; mipa 412969 leh hmeichhia 438925 an ni.
4A district ang zawngin Aizawl district-ah voter tam an ber a, 286807 an ni. Hnahthial district-ah voter an tlem ber a, 16294 an ni.
4Bial malah Tuichawng bialah voter an tam ber a, 36042 an ni a; Thorang bialah voter an tlem ber a, 14909 an awm.
4A vawikhatna atana MLA inthlan vote thlak thei tur nia ngaih (young voters) kum 18-19 inkar 50611 an awm.
4Senior citizen, kum 80 leh a chunglam voter 8490 an awm.
4Pianphunga rualbanlo (Persons with Disabilities) voter 3243 an awm a; mipa 1787 leh hmeichhia 1456 an ni.
4Mizoram pumah polling station hmun 1276 a awm a, 2018 inthlanpui aiin 112-in a tam zawk.