Mizoram lama an awm theihnan hma lakpui turin Thangram-in CM an ngen

Mizoram lama an awm theihnan hma
lakpui turin Thangram-in CM an ngen
Mizo Zirlai Pawl leh Thangram Indigenous Peoples’ Movement (TIPM) hruaitute chuan Thawhlehni khan chief minister Lalduhoma an hmu a. Thangram dinhmun hrang hrang an sawipui.
MZP leh Thangram hruaitute hian, Assam awp chhung Thangram area, square miles 180-a zau chu Mizorama rin luh a nih theihnan hma lakpui turin an ngen a. Assam awpna hnuaia awm Zofate tan Mizoram chhunga awm chu an hnam leh sakhua tan a him berin an ring tih an hrilh.
Assam awp chhung, Thangram (Singla Valley leh Langkaih Valley) chu Zofate chenna a ni a, hnam lian zawkten an nek reng a. Forest reserve area-a Assam sawrkarin a ngaih avangin, Thangram chhunga Zofaten in leh lo din kawnga harsatna an tawh bakah kawng tam takah harsatna an tawk tih an sawi. Hei vang hian an unaute awmna Mizoramah Thangram chu rin luh an duh a, theih anga hma lakpui turin chief minister hi an ngen.
Thangram mipui a hriat reng thu chief minister hian sawiin, hma an laknaah tangkai theihna a neih chuan tlanchhiat a tum lo tih a lo hrilh a ni.
TIPM chuan kum 2020 atangin Assam awp chhunga Zofate chenna, Thangram area sq. miles 180 chu hnam lian zawkte laka a him zawkna atan leh an hnampuite nen rorelna pakhat hnuaia an awm theihnan Mizoram state hnuaia rih luh phutin hma an la a. Theih ang ang hma la in, Prime minister hnenah pawh memorandum an lo thehlut tawh a; Assam sawrkar pawh vawi tam an sawipui tawh tih an sawi.