Mizoram leh solar energy

Aizawl Municipal Corporation Ward No. IX bialtu chuan tunhnai khan a bial chhunga zirlai harsa zual, inverter nei lo 170 hnenah solar lighting system (SLS) a sem a. Fur khawchhiat avanga electricity power lama harsatna kan tawh nasat lai taka hetianga a bial chhung zirlaite tana hmangchang hre taka chet la thiam Corporator hi a fakawm hle a. AMC Ward dangte pawhin hetianga hmalakna hi kalpui hlawm se, a duhawm hle a ni.
Mahni state puala electricity power siam chhuak tam ve lo Mizoram hian solar energy hi uar taka hmang tur kan nih vei nen, a nachang hi kan la hre tawk lo hle niin a lang. State dang atanga electricity power lei nan sum tam tak tak kan seng a, chu chu buaipui tham a ni.
Thawkkhat lai khan Aizawl hi Solar City-a siam tumna project te kha a awm a. Sawrkar department office tin hian solar energy han hmang vek thei se, chu chu mipui pawhin an entawn thuai ang a, tuna state dang atanga power kan chawkluh zat te pawh hi a kiam duai duai thei tur a ni a, mahse chu chu a la thleng dik thei lo.
State pachhiatzia hrechiang em emtu sawrkar hnathawkte leh ram hruaitute hian solar energy hi tuipui viau awm tak an nih laiin, rin ang leh beisei ang he huin hmalakna liantham hmuh tur a awm lo a tih theih awm e.
India rama state tin ten power an siamchhuah dan report thar ber (as of 31 March 2024)-ah chuan Mizoram a hniam ber a, mahni puala power siamchhuah zat chu 60MW tih a ni a, hei hi renewable energy (hydel) a ni a, state dang atanga chawkluh chu 75MW tih a ni bawk. Kan thenawm state Tripura hian hydel a nei ve lo na a, thermal (gas) erawh 1067.60MW zet a siam chhuak thung.
Tuna Mizoram sawrkarin DPR a peihfel tawh hydel project pathum vel hi tihpuitlin a nih hunah chuan power lamah kan hnianghnar ve deuh ang a, chumi peihfel hma kum 10 chhung chu state dang atanga chawkluh ngat ngat a ngai dawn a, chuvangin solar energy lam kan bawh thiam a pawimawh hle a ni.