Mizoram mamawh – “Nu Tha”

Kar kal ta Inrinnia Muthi branch MHIP Day lawmna hmanpuitu minister Lalthansanga chuan, “Nute hi kan ram rohlu, zirtirtu ropui ber an ni. Nu berin in chhung khur tha taka a enkawl chuan mi tha a chher chhuak a, chu chuan khawtlang nuam a siam a, ramin a zar a zo thin,” tiin a sawi a; thu dik tak a ni.
Mizo Hmeichhe Insuihkhawm Pawl hian Mizo hmeichhiate hmasawnna leh hamthatna tur chauh a thawk a ni mai lo va; ram leh hnam, sawrkar leh khawtlang hmasawnna tur thil tam tak pawh a thawk pah reng a, pawl zahawm leh ropui tak a ni, tiin kan sawi (comment) thei ang. 
MHIP Day a lo thlen hian, mi tam tak chuan “Nute” an tin zawn deuh bik thin a. MHIP member-te hi hmeichhia vek an ni a, Nu erawh an ni vek lo. Mahse, MHIP Day-a Nute pawimawhna sawichhuah a ni thin hian “Nute” pawimawhzia a lantir a ni.
Thuhriltu hmingthang tak D.L.Moody chuan, “Khawvela mi zawng zawngte nu hi ka nu ang vek hi ni sela, tan in (Jail) siam a ngai lo vang,” tiin a sawi a. Napolean-a chuan, “France ramin a mamawh ber chu nu tha a ni,” a ti a; “Nu tha tak min pe ula, ram nuam tak ka siamsak ang che u,” a ti bawk.
Khing a chunga thusawite atang ringawt pawh khian Nu pawimawhzia chu a lang chiang hle a. Mizorama ruihhlo ngai leh sual hrang hranga inhnamhnawih thalai an tam viau hian, ‘nu tha lo’ an tam ta viau tihna nge ni ang a, ‘nu tha tak’ fate pawhin sual kawng an zawh tho, kan ti dawn? 
Inchhungkhur pawimawhna hi chu kan hre bel viau tawh, chhungkuaa Nu ber mawhphurhna pawh kan sawi thei viau zel; chutih rual chuan kan hriatchian em em, a taka kalpui, nunpui lam erawh zir kan mamawh viau lawi si. Hei hi eng tin nge kan tih ang?
Chu tak chu MHIP pawimawhna pakhat a ni. MHIP hian tih tak zetin an ngaihpawimawh No One atan “Chhungkua” hi hmang se, MHIP Day apiangin report-ah telh ni se, chutianga an kalpui theih phawt chuan, thangkhat lian a han ral leh meuh chuan, ruihhlo ngaite enkawlna hi a thawl sawt ang a, jail tang an tlem avangin jail thenkhat khar ngai hial te pawh a awm thei mai awm e. 
Napolean-a ang hian, Mizoram mamawh ber chu “Nu |ha a ni” kan ti ve ang em le?