Mizoram mi ni si lo ram leitu fimkhurna tur hrilh

Mizorama cheng nghet ni lo, ram lei thinte fimkhur a ngai tih Land Revenue & Settlement hotute chuan an sawi.
LR&S secretary thuchhuak chuan, tunlai hian chhan hrang hrang avanga state dang leh ram dang atanga Mizorama rawn lut ten ram an lei nasa nia thu a than thu sawiin, hei hi sawrkar chuan a ngai thutak hle a, The Mizoram (Land Revenue) Act 2013 sawi angin ram neih chungchangah leh ram leh ram lei chungchangah mipui fimkhur a ngai tih a sawi.
Mizorama cheng nghet, an chhungte 1950 January 26 hmalama cheng tawh emaw, India president-in Constitution Article 342(1) hnuaia Mizoram state tan bik schedule tribe atana a puan te ni lo chuan, ram inhlan chhawnah sawrkarin phalna a pe hmasa a nih loh chuan tribal ni lo hnamdang hnenah ram hlanchhawn tur a ni lo tih a sawi.
‘Sawrkarin phalna a pek hmasak ngai bikah chuan phalna a pe hmasa a nih chauh loh chuan ram inhlan chhawnna lehkha chu register theih a ni loa, land record-ah pawh chhinchhiah theih a ni lo,’ a ti a. Dan loa ram inhlanchhawn reng reng chu thu tlinga ngaih a ni loh bakah eng court-ah mah dan anga kenkawh (enforce) theih a ni lo tih a sawi a ni.