Mizoram Open Athletics Meet

Mizoram Open Athletics Meet
September ni 24-26, 2024 chhung hian Rajiv Gandhi Stadium, Mualpuiah Mizoram Open Athletics Meet vawi 31-na nghah a ni dawn a; he intihsiakna lian hi kan hma lawk North East Olympic leh National Games-a Mizoram aiawh tur zawnna a ni nghal ang.
Mizoram Athletics Association buatsaih Mizoram Open Athletics Meet-ah hian mipa leh hmeichhe inelna a awm dawn.
Mipa tan bik intlansiak chi ruk a awm dawn a, chu’ngte chu – 100m, 200m, 400m, 1500m, 10,000m leh 4x100m relay race-te niin, zuan lamah high jump, long jump leh triple jump hmangin mipate hi an inel dawn a; a thlawh lamah discuss throw, javelin throw leh shot put a awm bawk ang.
Hmeichhe intlansiak hi 100m, 200m, 400m, 1500m leh 5,000m a ni dawn a; high jump leh long jump bakah discuss, javelin leh shot put hmangin inelna buatsaih a ni bawk dawn a ni.
Tuntum Meet-a tithate hi thla thar October maia Bubhaneswar khuaa nghah tur 35th East Zone Junior Championship-a Mizoram aiawh turin thlanchhuah an ni ang.
Mizoram Open Athletics Meet-ah hian a duh apiang tan tel theih a ni dawn a, phone number 8787334142/7005774720-ahte hian hriatbelh duh nei tan zawhfiah theih a ni.
Football leh infiamna hrang hrangah Mizoram hian hlawhtlinna lo chang tawh thin bawk mah se North East Olympic leh National Games-a medal tamna athletics-ah Mizoram hian medal la pha chu sawi loh beiseiawm ve deuh pawh a nei ngai lo a tih theih a, he thil veiawm tak hi Mizoram Athletics Association pawhin a vei niin a lang a, Mizoram Open Athletics Meet hi kan darthlalang leh hmasawnna rahbi pawimawh ni tura beisei a ni.