Mizoram Open Powerlifting Championship

Mizoram Powerlifting Association (MPA) buatsaih 6th Mizoram Open Powerlifting Championship 2024 chu March ni 16, 2024 (Inrinni) khan MPA Training Hall, Republic Vengthlangah zawh fel a ni.
Ni hnih awh he championship hawnna programme-a khuallian Zonunthari, Joint Secretary, Social Welfare Dept. Govt. of Mizoram chuan thalaite fuihin, Mizo thalai mipa leh hmeichhiate’n theihna nasa tak an neih thu leh national level mai ni lo, international level thlenga an in vawrh chhoh theihna chance tha tak a awm niin a sawi a, thuawihna leh taimakna nena theihtawp chhuah zel turin championship chhimtu powerlifter-te a fuih.
He championship hawnna programme hi Mizoram Powerlifting Association president HF Lalrinpuia (Rintea’n) a kaihruai a; report leh inhmelhriattirna hun general secretary Vanlalzarzova’n a hmang thung.
Technical report chu F. Lalmawipuia, fin. secretary, MPA-in a pe a, hun tawp tawngtai leh championship hlanna hun chu championship organising vice chairman C. Lalramzauva kutah a tla thung.
He championship hi Mizoram State Sports Council-in a sponsor a, Mizoram pum huap niin, lifter 42 an fuankhawm a ni.
Tuntum hian Lalhmangaihsanga chuan Mizoram dead lift record (323.5 kg) siamin, Lalhriatrenga’n Mizoram squat record (360 kg) thar a siam ve bawk.
A pumpuiah Thor’s Power Gym an champion a, anni hian gold medal panga, silver pahnih leh bronze medal pahnih bawk an hlawhchhuak.
Pahnihna Rebel Gym kutah gold pathum, silver pakhat leh bronze medal pakhat a lut ve bawk.
Best Lifter-ah Vanlalhriatrenga, Thor’s Power Gym thlan a ni a; Strong Men-ah Vanlaltanpuia, Thor’s Power Gym aiawh bawk thlan niin, Strong Women chu Lunglei Power Lighting Club pum chhuak Lucy Lalrinpuii a ni thung.