Mizoram panpui tum heroin man

Myanmar ram chhung Chin state-a Hualngoram Police-te chuan Mizorama tawlhluh tum heroin thahnem tak bakah a tawlhruk lama inhnamhnawihte nia sawi chu March 29 zan khan an man.
Hualngoram hnuaia thuneitu, administrative officer thuchhuah siam danin, March 20 zan dar 11.00 vel khan Mizoram dep, Myanmar ram chhunga Hualngoram Police-ten Mizorama tawlhluh tum heroin hawng 228 chu Rihkhawdarah an man a. Zungtiali (51) leh Lalrami (44), Sekan khua Myanmar ve ve nia inchhal, tuna Rihkhawdara khawsa mekte hnen atanga man a ni. Heroin bakah hian ruihhlo tawlh leh zawrhna atana hman tangkai mobile phone 6 bakah sumfai an man tel a ni.
Hualngoram Police leh sipaiten an chhuizuinaah ruihhlo supply-naa a mawhphurtu lian – Lalsailova (25 leh lirtheia Tahan atanga heroin phurthlatu Agape Thang (36), Sekan Myanmar nia inchhalte pawh man leh an ni a. Ruihhlo tawlhnaa inhnamhnawihte hi Hualngoram Judiciary Board chuan an chungchang a ngaihtuah dawn tih an sawi a ni.
Myanmar atang hian Mizoram lamah ruihhlo, a bikin heroin leh methamphetamine tawlh a nasa a, heroin hi chu Mizoram chhunga hralh tur a nih laiin Mizoram paltlanga state pawn lama kalpui zel tur pawh engemawzat a awm tih hriat a ni. Methamphetamine bik chu Mizoram chhunga thehthang a awm meuh lo nia hriat a ni a, state pawn leh ram danga kalpui zel tum, Mizoram kaltlanga tawlhruk mai chauh tih sawi a ni.
Hetihlai hian Myanmar-ah sawrkar sipai leh mipui inkara buaina a chhuah hnu ah sawrkar inrelbawlna mumal lo chu ruihhlo tawlh thinten hmang tangkaiin Mizoram lama ruihhlo tawlhluh a ti hluar zual a; Manipur kaltlanga India ram hmun danga ruihhlo tawlh thin pawh, Manipur-a tualchhung buaina avangin an paltlang hleithei ta loa, Mizoram bawk hi kalkawngah an hman avangin a tih hluar belhchhah hle tih thu dawn a ni.