Ram buaiah Good Friday leh Easter Sunday

Manipur-ah Zo hnahthlakte leh Meitei an intibuai a, buaina karah Zo hnahthlakte’n Good Friday leh Easter Sunday te tluang takin an hmang thei.
Nikuma an buai tirh lamah khan mipui an chawl thuap a, kohhran pawh an chawl. Biak in inkhawm pawh hun engemaw chen an nei lo a, tunah chuan kohhran tam zawk chu an inkhawm thei tawh. Good Friday leh Easter Sunday pawh an hmang thei a, mahse buai hmaa an hman ang diak diak chuan an hmang lo.
Manipur atanga thu dawn danin, Zo hnahthlak Kristiante hi Good Friday atanga Easter Sunday thlengin Mizoram ang bawkin an zaikhawm thin a, kuminah chuan zaikhawm a awm lo.
Tumkau Ni pawh an hmang thei a, kum dang ang bawkin zing karah kawng an zawh. Amaherawhchu, kum dang angin thingpui ruai an theh lo.
Manipur-a Zo hnahthlak kohhran tam zawkin Tumkau Ni-ah leh Good Friday-ah thingpui ruai an buatsaih thin a, kuminah chuan hei hi an ti thei lo. Easter Sunday-ah kohhrante’n ruai (zanriah) an theh thin a, kumin hian kohhran thenkhatin an ti thei lo a, a then chuan ruai hi an buatsaih.
Churachandpur, Kangpokpi, Chandel leh Tegnopal district-a Zo hnahthlakte’n tluang takin Good Friday leh Easter Sunday hi an hmang a, tawngtaiin hun an hmang nasa tih thu dawn a ni.
An buai zual lai, an inkah bur bur lai pawhin a duh apiangte tawngtaina turin biak in an hawng a, tunah pawh biak in tam zawk chu zing dar 5 atanga dar 9 thlengin tawngtai nan an la hawng tih thu dawn a ni. Biak inah hian an kal a, ram leh hnam tan an tawngtai thin a ni.