Mizoram Police din champha hmang Online-in FIR thehluh theih dawn

Mizoram Police din champha hmang
Online-in FIR thehluh theih dawn
Mizoram Police Raising Day vawi 54-na chu Nilaini khan lawm a ni a. Hei hi ram leh state tana an inhlanna hun atan hman thin niin, Mizoram Police zinga hnathawk tha leh chawimawi phute chawimawia lawmman hlan nghal an ni.
DGP Mizoram Sharad Agarwal chuan, kum 1972 atanga vawiin thlenga Mizoram boruak inlumlet chhoah Mizoram Police chu ralmuanna thlentu an ni a. An din chamah hian an mi chatuan ram pan ta te zahna an hlan a, thahnemngai taka Mizoram Police tana lo thawk tawhte pawh zahna an hlan tih a sawi a ni.
Mipuiin awlsam zawka online hmanga FIR an thehluh theihnan police station zawng zawngah CCTNS (Crime and Criminal Tracking Networks and Systems) bun an tum tih a sawi a. Mipui leh thawktute tanrualna azarah 2025 November 19 2025 khan Mizoram chu 18th Urban Mobility India-ah chawimawina hlan a ni tih a sawi bawk.
Ministry of Home Affairs leh state sawrkarin police-te tunlai thiamna mila thuam chakna tur – Police Modernisation Scheme hmanga an tha tih chak a ni tur chu lawmawm a tih thu DGP hian sawiin, PMS atang hian thawktute chu bullet-proof vehicles, forensic software leh hnuchhuina atana pawimawh hmanraw chi hrang hrang lei a ni dawn tih a sawi a ni.
He hunah hian IPS leh MPS retd. mi 18-in hmanpuiin thu an sawi a ni.He hunah hian IPS leh MPS retd. mi 18-in hmanpuiin thu an sawi a ni.
Mizoram Police din champha hman ruala police zinga hnathawk tha leh chawimawi phute chawimawina leh lawmman dawn ho chu –
DGP’s Cash Reward for Bravery:
He lawmman hi thih hlauhawm, hun harsa leh khirh tak hnuaia mahni nunna thapa huaisen taka hna thawkte hnenah hlan thin a ni a. Tun tumah hian Lalremsanga, driver grade–II leh constable T Lalhruaitluanga, Saitual DEF hnenah hlan an ni.
An ni hian ruihhlo do beihpui thlaknaah huaisen takin an bei a, kutthlak leh hliampui tuar chungin ramhnuai hmun khawkrawk leh chengker takah ruihhlo tawlhtu ni ngeia rinte chu beiin an umzui a, an inpekna avang hian ruihhlo thahnem tak man a nih phah a ni.
Kendriya Grihmantri Dakshata Padak 2025:
He chawimawina hi India ram pum huap niin Ministry of Home Affairs-in police hnathawk tha, chawimawi phu a tihte hnena hlan thin a ni. Intelligence category leh investigation category-ah an then
Intelligence category-a chawimawina dawngtute:
Inspector Lalchhuanmawia, CID (SB), head constable C Lalfakzuala, CID (SB). An ni hian ruihhlo leh ralthuam tawlhruk chhuinaah fing leh thiam takin, hmun hrang hrang atangin information rintlak an lakhawm a, a hun tak zelah heng information hi hman tangkaiin ruihhlo leh ralthuam tawlhruk chhui chhuahnaah leh dan leh thupek kenkawh kawngah an tangkai hle.
Investigation Category-a chawimawina dawngtu:
Sub inspector Samuel Lalramenkima, Mamit DEF. A ni hian 2025 February 13-a Kobawi luia ruang hmuh, tualthah thubuai khirh tak chu, ruang hmuh a nih atanga darkar 48 chhungin pawikhawihtu chhuichhuah kawngah a thawh that avangin he chawimawina hi hlan a ni. SI Samuel Lalramenkima leh a team-te hian ni 10 chhungin evidence pawimawh zawng zawng lakhawmin charge sheet an thehlut a, pawikhawihtua puh mi 8 man an ni.
Gallant Warriors Award 2024-2025:
He award hi Ek Hi Rasta Trust-in ram pum huapa mi huaisente chawimawina an pek thin “Citizens’ Gratitude to Gallant Warriors” peng pakhat niin, uniform-a inthuam chi, mipa leh hmeichhia, dam lai an ni emaw mitthi tawh an ni emaw hnena pek thin a ni.
Kuminah hian sub inspector J Lalnghinglova, 1st Bn MAP leh constable Lalkhawngaiha, 1st Bn MAP hnenah hlan a ni a. An ni hian helhote huaisen taka an beihna avangin he chawimawina hi an dawng a, an inbeihnaah hian hliampui na tak an tuar phah nghe nghe.
DGP’s Commendation Disc & Certificate 2025:
He award hi hmahruai kawngah leh entawntlaka hnathawk tha bikte chawimawina a ni a. Victor Zothansanga, MPS, Champhai DEF leh Alan Hmangaihsanga, MPS, Champhai DEF hnenah hlan a ni.
An ni hi heroin kg 7.422 (hawng 20) cheng vaibelchhe 2.22 hu mannaah hmahruaitu niin Mizoram Police record-a high quality heroin man tam ber a la ni.
Best Police Station of Mizoram 2025:
Ministry of Home Affairs chuan kumtinin police station tha a thlang thin a. Crime data vawng tha, investigation quality tha, case chinfel dana titha leh mipui feedback atangin police station tha hi thlan thin a ni.
Kum 2025-a Best Police Station of Mizoram award dawngtu chu Vaivakawn Police Station a ni.