Mizoram Police

Mizoram Police-te hriselna leh physical fitness intuaitharna bultan nan home minister Pu K. Sapdanga hovin ‘45 Minutes for All Ranks of Mizoram Police’ khuhhawnna nimin khan neih a ni a.
Home minister chuan, August ni 3 thlengin Police thi 77 chhinchhiah tawh niin kum 50 hnuai lam an ni tlangpui, tiin a sawi a. Ruihhlo leh a kaihhnawih natna do beihpui thlak a tul tih sawiin rin ngama hna thawk turin fitness tihpun a ngai, a ti bawk.
Kumin chhunga police thi hi an thahnem hman hle mai a, chawhrualin ni 2.7 dan zelah mi pakhat thi ang an ni a, thite pawh kum 50 hnuai lam, mihring dam chen atanga chhuta chak vanglai hun anga ngaih a ni. Thih chhan hi ruihhlo leh a kaihhnawih natna a ni tlangpui nia sawi a ni bawk.
Heta tang hian zawhna tam tak a lo lut a. Police-te hi chu darkar 24 chhung hna thawk thei tura ngaih an nih avangin taksa fitness leh hriselna ngaih pawimawh a ni a, police atana lak an nih dawn pawhin physical fitness fet taka endik a ni a. Hrisel tha leh in-fit tha bakah, ruangamah pawh san zawng leh âwm len zawng bithliah a la ni lehzel a. Chutiang zawng zawnga tling vekte chu police atan lak an ni thin a.
Chuti ni si, engatinge police-te ruihhlo leh a kaihhnawih natna avanga thi an tam tak viau mai le? tih chu zawhna hmasa ber a ni lo thei lo. Zawhna dang tam tak pawh a la awm thei ang a, he zawhna pakhat chauh pawh hi khel tham fê chu a tling awm e.
He zawhna hi chhan ni dawn ta se, pakhatnaah chuan, police discipline a tha lo, tih a ni thei ang. Police discipline chu a lo tha viau a nih pawhin, police tur lak laiin a tling lem lote lak an ni ve thin a ni ang, tih a ni leh ang a. Chu chu engtinnge a awm theih? tih zawhna a lo piang nghal ang a, political fitness vang a ni, tih ni ta se, police lakna chu a va ‘fair’ awm lo em em ve? tih a ni leh ang a. Chuti a nih chuan, police-te record a that loh chhan pakhatah chuan politician-te an ni thei dawn tihna a ni.
Record hriat chian theih loh tur chu, police lak a nih laia tehnaa tling zante pawh police an tan hnuah ruihhlo lamah an buai zui thei. Chuti a nih chuan, police discipline chu a va chhe awm ve, tih a ni leh ang.
Eng pawh ni se, kan police-te hian “Intuaithar” chu an lo mamawh hle a nih hi, tiin a khaikhawm theih mai ang a. Tuna ‘45 minutes’ leh ‘train to excel’ hi urhsun taka kalpui a nih chuan, state police tha berte zingah kan la inhlangkai leh thei maiin a rinawm.