Mizoram roll atangin Tuikuk-te hming paih kim

Mizoram roll atangin Tuikuk-te hming paih kim
Mizoram chhuahsana Tripura-a awmte hming chu Mizoram electoral roll atanga paih kim an ni ta.
Mizoram chhuahsantu Tuikuk-te hi Tripura hmar lam relief camp-ah an awm thin a, Mizorama kir lova Tripura-a awm nghet tura tih an ni.
January ni 16m 2020 khan sorkar laipui kaihhruaiin Mizoram leh Tripura state aiawhte leh relief camp-a an hruaitute an inbia a, relief camp-a mite hi Tripura-ah awm zui se tiin an rel a ni. Chumi hnu-ah Mizoram electoral roll-a an hming thai chhiat hna thawh zui a ni a, in leh lo dina Tripura-a inbengbelte hming thai chhiat zel niin, 2023 Mizoram inthlanpui hmaa paih kim tum a ni a, tum angin thil a kal ta a ni.
August ni 2 khan Mizoram Draft Electoral Roll, 2023 tarchhuah a ni a, hetah hian relief camp-a mite hming paih kim a ni tih thu dawn a ni.
Election department atanga thu dawn danin, Mamit district-ah mi 4832 paih an ni a, Kolasib district-ah mi 1096, Lunglei district-ah mi 311 paih niin, an vaiin mi 6239 an ni.
District pathumte hi relief camp-a mite’n vote an neihna a ni a, nikum lam atangin mi engemaw zat chu an hming paih a lo ni tawh.
Draft Electoral Roll, 2023-ah hian Mizoramah voter 838039 an awm a, Draft Electoral Roll, 2022-ah 842388 an awm. Kum hmasa aiin a tlem a, hei hi relief camp-a mite hming paih a nih vang a nih thu leh, chutih rual chuan vote nei thei tharte hming telh a ni bawk thu te dawn a ni.