Mizoram sangha leh cold storage

Nimin khan Fisheries department enkawltu minister Pu Lalthansanga chuan Ngaizel-ah, sangha tonnes 16 vel vawng tha thei tur ‘cold storage’ a hawng a.
Sangha, thlai leh thei vawn thatna ‘cold storage’ hi Mizoramin a mamawh lian tak pakhat a ni awm e. Tunhma deuh khan ram hruaituten, “Thlai ching rawh u, thei ching rawh u, company nen indawr dawn chuan tam tham tak thar chhuah a ngai…” tih kha an sawi dan pakhat a ni a. A ni reng lah tak a, a lei duhtute nen han indawr dawn tak tak chuan kan neihin a tlin lo ta thin a, company lam duh zat kan supply theih loh chuan, ‘marketing’ han ti ve bawk thin mah ila, a ngaihna a awm lo leh mai thin. Chutiang bawkin thilsiam chhuah lam, handicraft etc. te pawh a ni zel tho.
Sangha hi state dang atangin kan chaw lut nasa hle a, tun dinhmunah chuan kan mamawh zatve aia tam hi state dang atangin sangha kan chawlut mek a. Mizoram tharchhuah zawng zawngte hi Mizoram chhungah thehthang vek a ni lo a, man man zawka hralh theih a nih avangin sangha tharchhuaktuten thenawm state-ah an lo thawn chhuak ve reng bawk nen, hei vang hian state dang atanga sangha chawk luh pawh hi a tam phah a tih theih bawk awm e.
Tun dinhmunah Mizoram chhunga sangha dil zau zawng hi belhkhawmin Hectare 6,367.58 (Km 63.67 bial) a ni a, 2024-25 chhung khan hectare khatah sangha MT 1.35 tharchhuah a ni a, chumi awmzia chu nikum chhung khan Mizoramin sangha MT 6,852.16 kan tharchhuak tihna a ni a. Mizoram mipui 86% hian sangha ei anga chhut a ni a, hei hi projected population (13,90,000) atanga chhutin mihring 12,51,000-in sangha kan ei tihna a ni. Mi pakhatin kum khatah Kg 11 zel ei anga chhut a ni a, kum khat chhunga mamawh zat chu MT 13,761 tihna a lo ni ta a. Kan kum khat tharchhuah MT 6,852.16 kan paih chuan kan mamawh belh zat hi MT 6,908.84 (51.97%) tihna a ni.
Sangha MT 6,908.84 hi a sum ang zawnga chhut chuan, Sangha Kg 1 Rs 100 anga chhutin, Cheng vaibelchhe 69.08 a tling a. Chumi awmzia chu, kum tin a tlem thei ang bera chhut pawhin, Sangha man cheng vbch 69 hi state pawnah kan vawm chhuak reng tihna a ni.
Tuna cold storage kan nei thar hi a lawmawm; chutih laiin, Mizoram tharchhuah ni lo, state dang sangha tharchhuah dahna tur a nihna lai hi a thanatthlak ve deuh. Sangha dil kan neih zau ang hua kan tharchhuak tam leh si lo hi chu, tih loh tur kan tih thin vang te a ni thei mai ang em?