Mizoram sangha tin siamna
Zawlnuam Fishery Cooperation Society-in an din Mizorama sangha tin siamna hmasa ber chu nimin khan cooperation minister PC Vanlalruata’n Zawlnuamah a hawng a. Mizoram tana mellung thar, rotling tiin a sawi.
Report tawi: Kum 2024 July khan cooperative department-in sawrkar laipui hnenah thlen sakin, Integrated Cooperative Development Project kaltlangin cheng nuai 65 hmuh a ni. Khawl lei nan cheng nuai 40, a in sak nan cheng nuai 25 hman a ni. Sangha tin hi vawi khatah darkar 2 chhungin kg 50 siam theih a ni a, chu chu tin (can) 120 a ni.
Report-ah tarlan a ni chiah lo na a, tuna sangha tina an siam sangha hi ‘Indian Major Carb’, zunghnih/zungthum bawk vela lian niin a lang, a rih zawng (net weight) leh a man zat tarlan a ni chiah lo va, a man to lutuk lo tura ngaih a ni.
Hmasawnna rahbi thar tha tak chu a ni phawt mai. Tunhma kha chuan, Mizoram hian a tharchhuah ngawr ngawr lam kan thiam a, kan tih theih tawk a ni a, a processing lamah kan sang lua lo. Tunah chuan, hma kan lo sawn ve zel a, mi tih theih ang tih ve theih tumin, midang siamsa ringawta innghat lovin, kan ram chhunga kan tharchhuah, thlai, thei, leh sa etc. te hi kan sawngbawl (processing) chho ve ta zel a, hei hian a lawng (raw) ringawta tihral aiin hlawkna a keng tam zawk (value added) tih te pawh kan varpawh chho ve mek niin a lang a, a lawmawm hle a ni.
Hetih lai hian, Mizo ten hun rei lote chhunga hlawk hluai duhna thinlung kan put thinna hi kan mausam a hun ve ta hle tih erawh kan hriat a pawimawh awm e. Vawilehkhata hlawk hluai duhna leh tumna hian a daih rei thei thin lova, zawi zawia chawl lova hma lam pan bek bek reng hi hlawkna tluantling zawk chu a ni tih kan zir chhuah a pawimawh viau awm e. A market lam hian Mizoram hi a la pel lawk lovin a rinawm a, tualchhung mipuite zawh tawk tura ngaihtuahna kan sen pawh a pawimawh viau awm asin. Hnam dang duhzawng rim ai chuan a ram leilung fate duhzawng ‘rim’ a put te pawh a la pawimawh mahna!
Sangha tin kan han siam chhuak ve ta poh chu a ni a, kum tam taka hma lo hruai tawh, khawl lian leh chak zawk hmanga India mipui maktaduai tam tak lo hrai puar mek sangha tin siamtu company lian tak takte khum tur chuan beih fe a la ngai dawn tih chu a chiang sa reng mai. Chutih rual erawh chuan, a tuina (taste) leh thianghlimna (hygiene) lamah hming kan chher thei tih kan hriat a pawimawh. Food processing lamah bungthar kan kai leh ta hi a lawmawm e.