Vawk natna – African Swine Fever hrileng mek chu Mizoram sawrkar chuan khuarel chhiatna (natural calamity) ah a puang a, he hri avanga chhawmdawlna atan vawk thi pakhat zelah Rs.4000 pek an ni dawn.Disaster Management and Rehabilitation department chuan ASF hrileng ‘natural calamity’ a a puan thu hi a tichhuak a. Hemi bawhzuina atana inkaihhruaina a siam chu tihchhuah nghal a ni.
State Executive Committee (SEC) thurel angin Disaster Management Act 2005 hnuaiah ASF vanga vawk thi chhawmdawlna hi State Disaster Response Fund (SDRF) atanga pek an ni dawn tih sawi a ni a. Tanpuina inpek dan hi SDRF leh National Disaster Response Fund (NDRF) hnuaia inpek dan awmsa hman a ni a; tuna ‘natural calamity’ a puan hi kumin bika ASF leng niin, a len thu report hmasa ber atangin chhiar tan a ni ang.
Tanpuina dil tum tan anmahni bialtu district veterinary officer (DVO) hriatpuina leh chhinchhiah ang zela kalpui tur a ni a. ASF kai avanga thi tinzawn bik niin, ASF kai nia hriatchian vanga vawk suat (culled) erawh sawrkar laipui atanga tanpuina dawn theihna – Assistance to States for Control of Animal Disease (ASCAD) hnuaiah dilpui theih an ni dawn tho a ni.
Hetihrual hian ASF vanga vawk thi chhawmdawlna pek hi mi pakhat tan pek theih chin bituk a ni a. Vawk 6 chin bak pek a ni dawn loa, a aia tam thi pawh neih mah se, neitu pakhat hnuaiah chian paruk chin bak pek theih a ni dawn lo a ni.
Kumin January atanga October 14 thleng khan Mizoramah ASF vangin vawk 13889 an thi tawh a, ASF kai nia hriat vawk 23272 suat an ni tawh bawk. ASF leng hian khua 246 a tuam tawh a ni.
Mizoram sawrkarin ASF hrileng khuarel chhiatna thlengah puang
Get real time updates directly on you device, subscribe now.
Prev Post